قورعانىس ءمينيسترى وقۋ- جاتتىعۋدىڭ بارىسىن تەكسەردى: 8 مىڭ اسكەري مەن 2 مىڭ تەحنيكا
15 - ءساۋىر كۇنى «كوكتال» وقۋ- جاتتىعۋ پوليگونىندا «ايبالتا - 2019» ستراتەگيالىق كوماندالىق- شتابتىق وقۋ- جاتتىعۋى باستالعانىن بۇعان دەيىن حابارلاعان بولاتىنبىز. ول 3 - مامىرعا دەيىن جالعاسادى.
مينيستر وقۋ- جاتتىعۋ اۋماعىندا اسكەرلەردىڭ پراكتيكالىق ءىس- قيمىلدارىن بايقاپ، پوليگوننىڭ ينفراقۇرىلىمدىق نىساندارىن تەكسەردى.
«زاماناۋي قاۋىپ- قاتەرلەردى ەسكەرە وتىرىپ، اسكەرلەردى جاۋىنگەرلىك قىزمەتتىڭ نەگىزدەرىنە ساپالى وقىتۋعا، قارۋ- جاراق پەن اسكەري تەحنيكانىڭ ءتيىمدى قولدانىلۋىنا، سونداي- اق وقۋ- جاتتىعۋدى وتكىزۋ كەزىندە قاۋىپسىزدىك شارالارىنىڭ ساقتالۋىنا ەرەكشە نازار اۋداردى»، - دەلىنگەن قورعانىس مينيسترلىگىنىڭ اقپاراتىندا.
ساپار قورىتىندىسى بويىنشا ن. ەرمەكبايەۆ ستراتەگيالىق كوماندالىق- شتابتىق وقۋ- جاتتىعۋدىڭ ساپالى وتكىزىلۋى مەن بولىمشەلەردىڭ جاۋىنگەرلىك ازىرلىگىن جانە جاۋىنگەرلىك قابىلەتىن ودان ءارى ارتتىرۋ بويىنشا ءبىرقاتار ناقتى تاپسىرمالار بەردى.
وقۋ- جاتتىعۋعا قۇرلىق اسكەرلەرى، اۋە قورعانىسى كۇشتەرى، ارنايى وپەراتسيالار كۇشتەرى، ارنايى جانە ماتەريالدىق- تەحنيكالىق قامتاماسىز ەتۋ اسكەرلەرىنىڭ اسكەري بولىمدەرى مەن بولىمشەلەرى تارتىلدى. جالپى العاندا، مانيەۆرگە شامامەن 8 مىڭ اسكەري قىزمەتشى جانە 2 مىڭنان استام قارۋ- جاراق پەن اسكەري تەحنيكا، ونىڭ ىشىندە مايداندىق جانە ارميالىق اۆياتسيا جۇمىلدىرىلعان.