ش ق و-دا ەرمەك ءۇشىن ايالدامانى تالقانداعان ءۇش جىگىت 7 جىلعا سوتتالۋى مۇمكىن
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، التاي اۋدانى سەرەبريانسك قالاسىندا پوليتسياعا بەلگىسىز بىرەۋلەردىڭ بەس جول بەلگىسى مەن اۆتوبۋس ايالداماسى پاۆيلونىنا زاقىم كەلتىرگەنى تۋرالى حابار تۇسكەن.
وسىنىڭ سالدارىنان كەلگەن شىعىن 1 ميلليون تەڭگەدەن استى.
ءتارتىپ ساقشىلارى جەدەل-ىزدەستىرۋ شارالارى بارىسىندا ءۇش كۇدىكتىنى ۇستادى.
ولار 26 جانە 18 جاستاعى اعايىندىلار جانە ولاردىڭ 17 جاستاعى تانىسى بولىپ شىقتى.
بەلگىلى بولعانداي، ۇشەۋى ايالدامانى ەرمەك ءۇشىن تالقانداپ كەتكەن.
«ولار ۇيگە قايتىپ بارا جاتقاندا ارالارىنداعى جاسى ۇلكەنى جول بەلگىسىن تەپكىلەي باستادى. قىزىق كورگەن 17 جاستاعى جاس ءوسپىرىم قوسىلا كەتكەن. وسى كەزدە ءۇشىنشىسى دە باعاناعا شىعىپ، جول بەلگىسىن قولىمەن مايىستىردى»، - دەلىنگەن اقپاراتتا.
اۆتوبۋس ايالداماسى تۇسىنان ءوتىپ بارا جاتقان كەزدە اعايىندىلار پاۆيلوننىڭ مەتال قابىرعالارىن اياقپەن تەۋىپ زاقىمداي باستاسا، ولاردىڭ تانىسى وسى ۋاقىتتا ايالداماعا قاراما-قارسى ورنالاسقان جول بەلگىسىنىڭ باعاناسىن مايىستىردى. وسىدان كەيىن ۆاندالدار ۇيلەرىنە قايتىپ كەتىپ، بولعان وقيعا تۋرالى ەشكىمگە ايتپاعان.
«اتالعان فاكتىگە سايكەس ق ر ق ك-نىڭ 202-بابى 1-بولىگىمەن (بوتەننىڭ مۇلكىن قاساقانا جويۋ نەمەسە ءبۇلدىرۋ) سوتقا دەيىنگى تەرگەۋ امالدارى باستالدى. بۇل باپ بويىنشا ءۇش مىڭنان جەتى مىڭ ا ە ك-كە (10 ميلليون 350 مىڭ-24 ميلليون 150 مىڭ تەڭگە) دەيىنگى مولشەردە ايىپپۇل تولەۋگە، نە سول مولشەردە تۇزەۋ جۇمىستارىنا تارتىلۋعا، نە ءۇش جىلدان جەتى جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانۋى مۇمكىن»، - دەلىنگەن اقپاراتتا.
