پيازدىڭ 7 پايدالى قاسيەتى

استانا. قازاقپارات - پياز ءوزىنىڭ دامدىك قاسيەتىمەن دە، ەمدىك قاسيەتىمەن دە تانىمال. سوندىقتان ۇيىڭىزگە بۇل كوكونىستى الىپ قويۋدى ۇمىتپاڭىز.

ونى تاماقتانۋ تارتىبىنە قوسۋ دەنساۋلىقتى جاقسارتاتىنى ءسوزسىز. بۇل تۋرالى Healthline پورتالى.

بۇل كەرەمەت كوكونىس تاعامىڭىزعا ءدام قوسىپ قانا قويماي، اعزاڭىزدى دارۋمەندەر مەن مينەرالدارعا جانە باسقا دا قورەكتىك زاتتارعا تولتىرادى.

پيازدا س دارۋمەنى كوپ. ول يممۋنيتەتتى رەتتەپ قانا قويمايدى، سونىمەن قاتار كوللاگەن ءوندىرىسىن ارتتىرادى جانە تەمىردىڭ ءسىڭۋىن تەزدەتەدى. پياز - جاسۋشالاردى تۇراقسىز جانە زياندى مولەكۋلالاردان قورعايتىن كۇشتى انتيوكسيدانت.

بۇل كوكونىس ۆ توبىنىڭ ۆيتاميندەرىنە، اتاپ ايتقاندا، فولي قىشقىلىنا جانە ۆ6 ۆيتامينىنە باي. بۇل قوسىلىستار مەتابوليزم ءۇشىن دە، ەريتروتسيتتەردى ءوندىرۋ ءۇشىن دە وتە ماڭىزدى.

پيازدا بۇيرەك جۇمىسىنا كومەكتەسەتىن، سۇيىقتىق بالانسىن ساقتايتىن جانە بۇلشىقەتتىڭ جيىرىلۋىنا اسەر ەتەتىن كاليي كوپ.

سونداي-اق جۇرەك- قانتامىر جۇيەسىندە پروبلەماسى بار ادامدار ءۇشىن كۇندەلىكتى ديەتاعا پياز قوسۋ ۇسىنىلادى. ويتكەنى تامىر داقىلىندا قان قىسىمىن تومەندەتۋگە كومەكتەسەتىن قابىنۋعا قارسى اگەنت كۆەرتسەتين كوپ.

بۇل كوكونىس ءتىپتى قاتەرلى ىسىكتىڭ ورشۋىنەن دە قورعاي الادى. زەرتتەۋلەر پيازدى ۇنەمى تۇتىنۋ اسقازان قاتەرلى ىسىگى قاۋپىن %22 تومەندەتەتىنىن كورسەتتى.

2-ءتيپتى قانت ديابەتى بار ادامدار دا پيازدى ءجيى جەۋگە تىرىسۋى كەرەك. ويتكەنى كوكونىس قانداعى قانت دەڭگەيىن تومەندەتۋگە كومەكتەسەدى. سونىمەن قاتار پياز سۇيەك كۇشىن ارتتىرادى جانە توتىعۋ سترەسىن ازايتۋعا كومەكتەسەدى.

پياز باكتەرياعا قارسى قاسيەتتەرىمەن كەڭىنەن تانىمال. سونىمەن قاتار جاڭا جانە وڭدەلگەن ميكروبتاردىڭ ءوسۋىن تەجەي الادى.