ينتەرنەت الاياقتىق 7 پايىزعا ءوستى
بۇل جايلى ونلاين فورماتتا وتكەن باسپا ءسوز بريفينگى بارىسىندا سەمەي قالالىق پوليتسيا باسقارماسى كريمينالدىق پوليتسيا ءبولىمىنىڭ باستىعى داۋلەت بەليبايەۆ مالىمدەدى.
«جىل باسىنان بەرى سەمەيدە 530 الاياقتىق فاكتىسى تىركەلگەن. بۇل جالپى قىلمىستىڭ 22%- ى. سونداي-اق بيىل ينتەرنەت الاياقتىق 7 پايىزعا ارتىپ وتىر. عالامتور ارقىلى جاسالاتىن قىلمىستاردىڭ الدىن الۋ ءۇشىن حالىق اراسىندا ءتۇسىندىرۋ جۇمىستارى جۇرگىزىلۋدە. پوليتسيا قىزمەتكەرلەرى جۇمىسىنىڭ تيىمدىلىگىن ارتتىرۋ ماقساتىندا ءار توقسان سايىن جەدەل- پروفيلاكتيكالىق شارالار قولعا الىنىپ جاتىر»، - دەدى ول.
ونىڭ ايتۋىنشا، 2021-2022 -جىلدارعا ارنالعان اقپارات تەحنولوگيالارىن پايدالانا وتىرىپ جاسالاتىن قىلمىستارعا قارسى ءىس- قيمىل جونىندەگى ۆەدومستۆولىق باعدارلاما ىسكە اسىرىلۋدا. سوعان وراي قالالىق پوليتسيا باسقارماسىندا ينتەرنەتتەگى قىلمىستاردى اشۋ بويىنشا مامانداندىرىلعان جەدەل- تەرگەۋ توبى قۇرىلعان.
ايتا كەتەيىك، ينتەرنەت الاياقتىقتىڭ ەڭ كوپ تارالعان ءتاسىلى - بۇل سايتتاعى حابارلاندىرۋ بويىنشا تاۋارعا نەمەسە قىزمەتكە الدىن الا تولەم سۇراۋ بولىپ وتىر.