جەتى جىلدا اۋىلدا تۇراتىن 7 ميلليون تۇرعىننىڭ ءومىر ءسۇرۋ ساپاسى جاقسارادى - رومان سكليار
بۇل تۋرالى بۇگىن ۇكىمەت وتىرىسىندا «اۋىل - ەل بەسىگى» باعدارلاماسىنىڭ جۇزەگە اسىرىلۋ بارىسى جايىندا بايانداعان ق ر پرەمەر-ءمينيسترىنىڭ ورىنباسارى رومان سكليار ايتتى، دەپ حابارلايدى قازاقپارات ءتىلشىسى.
«جۇرگىزىلىپ جاتقان ينفراقۇرىلىمدى جاڭعىرتۋ اۋىل ەكونوميكاسىن دامىتۋعا جاڭا سەرپىن بەرەدى. وسىعان بايلانىستى وبلىس اكىمدىكتەرى دامۋ الەۋەتى بار ءاربىر اۋىل ەكونوميكاسىن دامىتۋ جوسپارىن ازىرلەپ قابىلداۋ قاجەت. جوسپار ءبىرىنشى كەزەكتە اۋىلدا ينۆەستيتسيالار مەن قاجەتتى كادرلاردى تارتۋ، سونداي-اق شاعىن جانە ورتا بيزنەستى دامىتۋ جونىندەگى ءىس-شارالاردى قامتۋى ءتيىس. ءاربىر اۋىل اكىمىنىڭ اۋىلدى ودان ءارى دامىتۋدىڭ ناقتى پايىم، كوزقاراسى بولۋى قاجەت»، - دەدى رومان سكليار.
ونىڭ اتاپ وتۋىنشە، ۇسىنىلعان شارالاردى ءتيىمدى ىسكە اسىرۋ ءۇشىن، رەسپۋبليكالىق جول كارتاسىنىڭ جوباسى ازىرلەندى. وسىنداي كارتا ءاربىر وبلىستا ازىرلەنۋى ءتيىس.
«ءبىز اكىمدىكتەرمەن بىرلەسىپ، تىرەك جانە سپۋتنيكتىك اۋىلداردى جىلدار بويىنشا 2027-جىلعا دەيىن دامىتۋ كەستەسىن قالىپتاستىرۋىمىز قاجەت. «اۋىل - ەل بەسىگى» جانە باسقا دا مەملەكەتتىك باعدارلامالار اياسىندا ءاربىر اۋىلدى قارجىلاندىرۋ كولەمى مەن كوزدەرىن انىقتاۋ قاجەت. اۋىل ەكونوميكاسىن دامىتۋ كارتاسىن ازىرلەپ، ءتيىستى جوبالىق قۇجاتتامانى دايىنداۋ كەرەك»، - دەدى ول.
ۆيتسە-پرەمەردىڭ دەرەگىنشە، جوبانى ىسكە اسىرۋ 7 جىل ىشىندە 7 ميلليون اۋىل تۇرعىنىنىڭ ءومىر ءسۇرۋ ساپاسىن جاقسارتۋعا مۇمكىندىك بەرەدى. 7 مىڭ شاقىرىمنان استام كەنتىشىلىك كوشەلەر سالىنىپ، جوندەۋدەن وتكىزىلەدى.
«بارلىق اۋىل حالقى ساپالى اۋىز سۋمەن قامتىلاتىن بولادى. الەۋمەتتىك نىسانداردى جاڭعىرتۋ بويىنشا كەڭ اۋقىمدى جۇمىستار جۇرگىزىلەدى. جالپى، بارلىق شارالار كەشەنى اۋىلداردى ودان ءارى سەرپىندى دامىتۋدى قامتاماسىز ەتەدى، بۇل ءوز كەزەگىندە ەل ەكونوميكاسىنا وڭ اسەرىن تيگىزەدى»، - دەدى ۇكىمەت باسشىسىنىڭ ورىنباسارى.
