قازاقستاننىڭ 7 ازاماتى كورەيادا اۋىر جۇمىستان كوز جۇمعان

None
None
 نۇر- سۇلتان. قازاقپارات - كورەيادا اۋىر جۇمىس سالدارىنان قازاقستاننىڭ 7 ازاماتى قازا تاپتى. بۇل تۋرالى بۇگىن ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات ءتىلشىسى.

«مەندەگى اقپاراتقا سايكەس، وسى جىلدىڭ باسىنان بەرى مىڭنان استام قازاقستان ازاماتى وڭتۇستىك كورەيادان ءوز ەركىمەن ەلگە ورالدى. دەپورتاتسيالانعاندارى دا بار. ولاردىڭ سانى مۇنان الدەقايدا كوپ. ازىرشە دەرەكتەر جاريا ەتىلمەيدى. بۇل وپەراتسيا جالعاسىپ جاتىر. ول جاقتا قالعان قازاقستان ازاماتتارى ءالى دە بارشىلىق. بىزگە قايعىلى حابارلار دا كەلىپ ءتۇسىپ جاتىر. سوڭعى جارتى جىلدىڭ ىشىندە وڭتۇستىك كورەيا اۋماعىندا زاڭسىز جۇرگەن 7 ازاماتىمىز قايتىس بولدى. جاسى 30 بەن 40 تىڭ اراسىندا، جاپ- جاس جىگىتتەر» ، - دەدى ايبەك سمادياروۆ.

وسى رەتتە رەسمي وكىل ولاردىڭ نەدەن قازا تاپقانىن دا ايتىپ بەردى.

«قارا جۇمىستان كەشكە ۇيلەرىنە شارشاپ كەلىپ ۇيىقتاعاننان كەيىن تاڭەرتەڭ ويانباي قالعان. ولاردا مەديتسينالىق ساقتاندىرۋ جوق، جۇمىس ىستەپ جاتقان مەكەمەسىمەن كەلىسىمشارتى بولماعاندىقتان ەشقانداي قۇقىقتارى جوق. تۋىستارى دەنەسىن ەلگە جەتكىزەتىن كەزدە ءبىراز قينالدى. سەبەبى ءبىر مۇردەنى وڭتۇستىك كورەيادان ەلگە جەتكىزۋگە 6-7 مىڭ دوللار قاراجات كەتەدى» ، - دەدى ول.

سوڭعى جاڭالىقتار