پىكىرتالاسقا قاتىسقاندا ەسكەرەر 7 جايت

 استانا. قازاقپارات - پىكىرتالاس -  جاستاردى كوشباسشىلىققا باۋلۋدىڭ ءبىر جولى. جەكە تۇلعا بولىپ قالىپتاسۋ ءۇشىن دە جەكە پىكىر بولۋ كەرەك. ال جەكە پىكىر ايتا ءبىلۋ مەن ويىڭدى ورىندى جەتكىزۋ ءۇشىن پىكىرتالاس جارىستارىنا قاتىسقان ابزال.

 پىكىرتالاس جەكە تۇلعانىڭ تانىمىن كەڭەيتەدى. قازىرگى ىسكەر ادامدارعا قوعامدىق- الەۋمەتتىك ماڭىزدى ماسەلەلەردى جەتە جانە جەمىستى تالداي الۋ قابىلەتى قاجەت. ولار ءوز ويلارىن تۇسىندىرە، دالەلدەي الۋى كەرەك، قارسى جاقتىڭ پىكىرىن جوققا شىعارىپ، ءوز پىكىرىنىڭ دۇرىستىعىنا كوز جەتكىزۋى ءتيىس. سوندىقتان ىسكەر ادامدار ءسوزتالاس ونەرىن، پىكىرتالاس شەبەرلىگىن ۇيرەنۋدى ماقسات ەتەدى. پىكىرتالاس شەبەرلىگى دەگەنگە جەتكىلىكتى، جان- جاقتى بىلىممەن قوسا، پىكىرتالاس تۇرلەرىن، ماقساتىن، ولاردىڭ ەرەكشەلىكتەرى مەن نەگىزگى تالاپتارىن، ءسوزتالاس مادەنيەتىن، وندا ءجيى قولدانىلاتىن امال- تاسىلدەردى جەتىك مەڭگەرۋ جاتادى. ال پىكىرتالاس جارىستارىنا قاتىسقاندا ەسكەرەر جايتتار بولادى. ءبىز بۇگىن پىكىرتالاس مادەنيەتىنە جاتاتىن سول جايتتارعا توقتالاتىن بولامىز.

 1. پىكىرتالاستا وي مەن ءسوزدىڭ بىرلىگى -  جەڭىسكە جەتكىزەتىن قۇرال. بارىنەن بۇرىن پىكىرتالاستىڭ تاقىرىبىنا قاتىستى ۇعىمداردى انىقتاپ الىپ، قاجەتتى سوزدەر مەن تەرميندەردى ءدال تاۋىپ قولدانۋ قاجەت. اسىرەسە عىلىمي تەرميندەردى شەكتەن تىس قولدانباعان ءجون.

 2. پىكىرتالاسقا تۇسكەندەردىڭ بارىنە بىردەي قولدانىلعان سوزدەر تۇسىنىكتى بولۋى قاجەت. كەيدە كوپ ماعىنالى سوزدەردىڭ اسەرىنەن تۇسىنبەستىكتەر ورىن الۋى مۇمكىن. سوندىقتان كوپ ماعىنالى سوزدەردى دۇرىس ىرىكتەپ قولدانباۋ سويلەۋدەگى قاتەلىككە ۇرىندىرادى. سوندىقتان كەيبىر جاعدايلاردا ءسوزدى قانداي ماعىنادا جۇمساپ تۇرعانىڭدى ايتىپ قويعان دا ءجون. ءسوز ماعىنالارىمەن جۇمىس ىستەۋ ماقساتىندا تۇسىندىرمەلى جانە ەتيمولوگيالىق سوزدىكتەردى ءجيى قولدانۋ قاجەت.

 3. پىكىرتالاستا بارلىق پىكىرگە بىردەي قارسى شىعا بەرۋگە بولمايدى. كەيدە قارسىلاسىڭنىڭ كەلتىرگەن دالەلىنە كەلىسكەن دە دۇرىس. ءبىراق كەلىسە وتىرىپ، ول دالەلدەردىڭ پىكىرتالاس تاقىرىبىنا تىكەلەي قاتىسى جوق ەكەندىگىن تۇسىندىرە الۋ قاجەت. ءسويتىپ، ءوز كوزقاراسىڭنىڭ دۇرىستىعىن قورعاي الۋ قاجەت. ەگەر قارسى جاقتىڭ كەلتىرگەن دالەلدەرى اقىلعا سىيىمدى، ورىندى بولسا، وعان قارسى شىعۋدىڭ كەرەگى جوق. قاسارىسقان قىڭىرلىق ەش ۋاقىتتا پىكىرتالاسقا ناتيجە بەرمەيدى.

 4. پىكىرتالاس مادەنيەتىندە قارسىلاسىڭدى قۇرمەتتەۋ، پىكىرىن سىيلاۋ، ونى سابىرلىقپەن تىڭداي ءبىلۋ كەرەك. ونىڭ دالەلىنە نانىمدى دالەلدەرمەن تويتارىس بەرۋگە بولادى، ءبىراق دورەكى سوزدەرمەن، مازاق كۇلكىمەن جابىرلەۋگە، داۋىس كوتەرىپ ۇرىسۋعا مۇلدەم بولمايدى. وزگەلەردىڭ كوزقاراسىن قۇرمەتتەي ءبىلۋ -  ويلى، اقىلدى، ءبىلىمدى ادامداردىڭ ءىسى.

 5. پىكىرتالاستا قىزبالىققا سالىنۋ ورىنسىز. ەموتسياعا بەرىلگەن ادام قارسى جاقتىڭ پىكىرىن تۇسىنۋگە، تىڭداۋعا قۇلىقسىز بولادى. كەرىسىنشە، سالقىنقاندى، سابىرلى، ءوزىن- ءوزى ۇستاي الاتىن ادام ءار ۋاقىتتا جەڭىسكە جەتەدى. سەبەبى ول انىق، ايقىن، بايىپتى ويلاي الادى. سوندىقتان سابىرلىلىقتى پىكىرتالاستا ساقتاي ءبىلۋ -  سايىسشى ءۇشىن ماڭىزدى قاسيەت.

 6. كوپشىلىك الدىنداعى ءسوز سەكىلدى، پىكىرتالاستاعى ءسوزدىڭ كۇشى -  اسەر ەتۋ مۇمكىندىگىندە. ول نەعۇرلىم ايقىن، نەعۇرلىم ناقتى بولسا اسەر ەتۋ كۇشى دە سوعۇرلىم كۇشتى بولادى. ءسوزدىڭ دۇرىستىعى، دالدىگى، جاتىقتىعى، تازالىعى -  وي ايقىندىلىعىنىڭ باستى شارتتارى. سوندىقتان پىكىرتالاس مادەنيەتىنىڭ باستى تالابى سوزدەردى ماعىناسىنا ساي ورىندى جۇمساي ءبىلۋ كەرەك.

7. پىكىرتالاستا ويدى انىق جەتكىزۋدىڭ باستى ءتاسىلى -  ءسوزدىڭ گرامماتيكالىق قۇرىلىسىن مەڭگەرۋ. گرامماتيكانىڭ زاڭدىلىقتارىن يگەرۋ سويلەمدى ماقساتىنا ساي قۇرۋ ءۇشىن كەرەك. ويدى جەتكىزۋ تاسىلدەرىن ماتىنمەن جۇمىستا ۇيرەنۋگە بولادى.

Massaget.kz