ۇيقى جەتكىلىكسىزدىگىنىڭ 7 ەڭ جامان اسەرى

استانا. قازاقپارات - ​ۇيقىنىڭ قانباۋى ءبىرقاتار كەشەندى پروبلەمالاردىڭ تۋۋىنا سەبەپشى بولارى بەلگىلى.

ول جامان اۋرۋلاردىڭ تۋۋىنا دا اكەپ سوعادى، كوڭىل- كۇيگە دە، ءتىپتى ومىردەگى جەتىستىگىڭىزگە دە كەرى اسەرىن تيگىزۋى مۇمكىن. دارىگەردىڭ ايتۋىنشا، ەر ادامداردىڭ تاۋلىكتىك ۇيىقتاۋ مولشەرى 7 ساعات 42 مينۋتتى قۇراسا، ال ايەل ادامدار ءۇشىن 4 مينۋت ازىراق.

ۇيقى - ادامنىڭ گورمونالدى جاعدايىنا دا جاقسى اسەر ەتەتىن كۇردەلى ءۇردىس.

از ۇيىقتاعان ادامداردا بۇل مەحانيزمدەر بۇزىلادى. ۇيقى اعزانىڭ دەمالۋىنا عانا مۇمكىندىك بەرمەيدى، ورتا جۇيكە جۇيەسىن وياۋ جۇرگەندە جينالعان مەتابوليتتەردەن دە تازالايدى. ناتيجەسىندە كۇنى بويى جيناقتالعان قاجەتتى ەمەس اقپاراتتار وشىرىلەدى، جاڭاسىنا ورىن بەرىلەدى. ۇيقىنىڭ قانباۋى قانداي اۋرۋلارعا اكەپ سوعاتىندىعىن دارىگەر اتاپ بەردى.

گيپەرتونيا

ۇيقىنىڭ از بولۋى جۇرەك-قان تامىر جۇيەسى قىزمەتىنىڭ بۇزىلۋىنا، قان قىسىمىنىڭ كوتەرىلۋىنە اكەپ سوعادى. جانە دە قان قىسىمىنىڭ كوتەرىلۋى، باستىڭ اينالۋى، دەنەنىڭ ءدىرىلى، تەرشەڭدىك، دەم الىستىڭ قيىنداۋى، باستىڭ ۇنەمى اۋىرۋى جۇرەك- قانتامىر جۇيەسى اۋرۋلارىنىڭ، ينسۋلت پەن ينفاركتىڭ ورىن الۋىنا سەبەپكەر بولادى. بۇل پروبلەمالار ءسىزدى مازالاماس ءۇشىن ۇيقىنى قاندىرعان ابزال.

كوزدىڭ كورۋ قابىلەتىنىڭ ناشارلاۋى

ۇيقىنىڭ جەتكىلىكسىزدىگى كوزدىڭ كورۋ جۇيەسىنىڭ ىسىنۋىنە اكەپ سوعادى. ياعني ىشكى باس قان قىسىمىنىڭ جوعارىلاۋىنا اكەپ سوعىپ، تامىرلار جۇيەسى زاقىمدانادى. كەي كەزدەرى كوزدىڭ كورۋ قابىلەتى دۇرىستالۋى ءۇشىن جەتى ساعات كولەمىندە ۇيىقتاۋدىڭ دا پايداسى مول.

سەمىزدىك

تۇندە ءتورت ساعات ۇيىقتايتىن ادامدار جەتى ساعات ۇيقىعا كوڭىل بولەتىن ادامدارعا قاراعاندا %74 مولشەردە سەمىزدىكتى قابىلدايدى. ال بەس ساعات ۇيىقتايتىندار وزگەلەرگە قاراعاندا %50 مولشەرلەمەدە سەمىزدىككە شالدىعادى.

شارشاڭقىلىق سيندرومى

ۇنەمى شارشاڭقى كەيىپتە جۇرەتىن ادامداردا السىزدىكپەن قوسا توڭۋ، بۇلشىقەتتەردىڭ اۋىرسىنۋى بايقالادى. از ۇيىقتايتىن ادامدار ناتيجەسىندە اقپاراتتى دۇرىس قابىلداي الماي، كۇنى بويى ءوزىن جايسىز سەزىنىپ جۇرەدى.

گورمونالدى وزگەرىستەر

ۇيقىنىڭ جەتكىلىكسىزدىگى گورمونالدى وزگەرىستەرگە دە اكەپ سوعادى. مۇنىڭ قاسىندا سالماقتىڭ ارتۋى، بەزەۋلەردىڭ پايدا بولۋى، شاشتىڭ ءتۇسۋى تۇر. ۇيقىنىڭ ازايۋى ەرتە قارتايۋعا اكەپ تىرەلەدى. ۇيقى مەلاتونين گورمونىنىڭ ۇيلەسىمدىلىگىمەن ەرەكشەلەنەدى. ونىڭ ءتۇزىلۋىنىڭ شىڭى تۇنگى ەكىگە سايكەس كەلەدى. ەگەر مۇنداي ۋاقىتتا ءسىز وياۋ جۇرەتىن بولساڭىز، مەلاتونين جەتكىلىكسىزدىگى بايقالىپ، ءسىزدىڭ اعزاڭىز تەز قارتايادى.

سىرتقى كەلبەتتىڭ وزگەرۋى

گورمونالدى وزگەرىستەر ورىن العان جاعدايدا كوللاگەن مەن ەلاستيننىڭ ءتۇزىلۋى بۇزىلادى، بۇل تەرىنىڭ جۇمساقتىعىن، نازىكتىگىن سەزدىرىپ تۇراتىن تەرى كاركاستارىنىڭ جوعالۋىنا جول اشىپ، اجىمدەر كوبەيە تۇسەدى. ادەتتەگىدەن از ۇيىقتايتىن ادامدار ءوز قاتارلاستارىنان 5-10 جاسقا ۇلكەن كورىنەدى. ال ۇيقىنىڭ جەتىسپەۋشىلىگىن كورسەتەتىن سىرتقى بەلگىلەر - كوزدىڭ قىزارۋى، بەتتىڭ بوزارۋى، كوزدىڭ استىنىڭ قارايۋى، جوعارى دارەجەدەگى ىسىڭكىلىك، ت. ب.

سۇيەكتىڭ سىنۋى

ۇيقىنىڭ جەتكىلىكسىزدىگىنەن ەر ادامداردا سۇيەك جۇقارىپ، سىنعىش كەلەدى. بۇل ەر ادامداردا بولاتىن تەستوستەرون گورمونىنىڭ ازايۋىنا بايلانىستى، بۇل گورموننىڭ جوعالۋى تەك بەدەۋلىككە عانا ەمەس، سۇيەكتىڭ سىنۋىنا دا اكەلەدى.

دارىگەر تولىققاندى ۇيقىنى باعالاي بىلۋگە شاقىرادى: سونىڭ ارقاسىندا ءتۇرلى پروبلەمالارعا دۋشار بولمايسىز.

 

دەرەككوزى: ​orthodox.od.ua