الداعى 7 جىلدا الماتىنىڭ ەكولوگياسى جاقسارادى

الماتى. قازاقپارات - الماتى اكىمدىگى قالانىڭ ەكولوگيالىق احۋالىنىڭ 2018-2025-جىلدارداعى ماقساتتى كورسەتكىشتەرىن ايقىندادى، دەپ حابارلايدى قازاقپارات ءتىلشىسى.

جاڭا قۇجاتتا قورشاعان ورتاعا شىعارىلاتىن لاستاۋشى زاتتاردى تومەندەتۋ، سۋ سىنامالارىن جاقسارتۋ، جاسىل جەلەك اۋماعىن ارتتىرۋ جوسپارلانعان.

E-gov ەلەكتروندىق پورتالىندا «2018-2025-جىلدارعا ارنالعان قورشاعان ورتا ساپاسىنىڭ نىسانالى كورسەتكىشتەرىن بەكىتۋ تۋرالى» الماتى قالاسى ءماسليحاتىنىڭ شەشىمى ورنالاستىرىلدى. قۇجات 6- قاراشاعا دەيىن قوعام تالقىلاۋىندا بولادى.

قۇجاتقا سايكەس، 2025-جىلعا قاراي اۋاعا شىعارىلاتىن لاستاۋشى زاتتاردىڭ كولەمى جىلىنا قازىرگى 74969 توننادان 72012 تونناعا تومەندەتىلۋى ءتيىس.

ال اۆتوكولىكتەر بولەتىن زياندى زاتتاردى جىلىنا 80 مىڭ توننادان 38 مىڭ تونناعا ازايتۋ كوزدەلگەن.

ەسكە سالايىق، الماتى اكىمى باۋىرجان بايبەكتىڭ ايتۋىنشا، ساراپشىلار 2035-جىلعا دەيىن قالا حالقى 3 ميلليونعا جەتەتىنىن جوسپارلاۋدا. بۇل قازىرگىدەن 30 پايىزعا كوپ.

الداعى 15 جىلدا جاياۋ جۇرگىنشىلەر مەن ۆەلوسيپەدشىلەر سانى - 3 ەسە، قوعامدىق كولىكتى پايدالانۋشىلار 4 ەسە ارتۋى ءتيىس. ال جەكە كولىك مىنەتىندەر سول قالپىندا - 600 مىڭ شاماسىندا قالماق.

«بۇل ماقساتقا جەتۋ وڭاي ەمەس. ءبىراق، ءبىز جەتۋگە تىرىسامىز. 2050-جىلعا تامان قايتا وڭدەلگەن قالدىقتار مەن تابيعي ەنەرگيا كوزدەرى 10 ەسە ارتۋى كەرەك»، - دەگەن بولاتىن قالا باسشىسى.

بۇگىندە الماتى اۋاسى 2,5 ميكرون (ر م 2,5) ديامەترلى شاڭ-توزاڭمەن لاستانعان. تولەبي امانگەلدى كوشەلەرىنىڭ قيىلىسىنداعى بۇل كورسەتكىش قازىر 0,5 م گ/م3 قۇرايدى. 2025-جىلعا قاراي ونى 0,160 م/م3 جەتكىزۋ كوزدەلگەن.

سونداي-اق قازگيدرومەتتىڭ 27№-پوستىنىڭ اۋدانىندا (مەدەۋ مەتەوستانساسى، گورنايا ك- ءسى، 548) اتموسفەرادا كۇكىرت ديوكسيدىنىڭ ماكسيمالدى دەڭگەيىنىڭ شەكتى رۇقسات ەتىلگەن كونتسەنتراتسياسى 2,5 كورسەتىپ وتىر. الداعى جىلدارى ونى 0,56 عا ءتۇسىرۋ جوسپارلانعان.