ا ق ش- تاعى تابيعات اپاتىنان 7 ادام قۇربان بولدى
جەكسەنبى كۇنى تابيعاتتىڭ دۇلەي كۇشىنىڭ قۇربانىنا اينالعاندار سانى 7 ادامعا جەتتى. وزگەلەرگە قاراعاندا، تابيعي اپاتتان تەحاستىڭ شىعىسى قاتتى زارداپ شەكتى. وندا وتكەن تاۋلىكتە تورنادو 4 ادامنىڭ ءومىرىن قيدى، 50 ادام ءتۇرلى دەنە جاراقاتتارىن الدى. كەڭدىگى 25 ك م بولاتىن قۇيىن 56 ك م ايماقتى ءسۇرىپ ءوتتى.
«شىعىن وتە كوپ. وقيعانىڭ سالدارىن كوزگە ەلەستەتۋدىڭ ءوزى قورقىنىشتى»، - دەدى جەكسەنبى كۇنى وتكەن باسپا ءسوز ءماسليحاتىندا داللاستان 80 ك م ايماقتا ورنالاسقان كانتون قالاسىنىڭ ءمەرى. مۇندا اۋا رايىنىڭ كۇردەلىلىگىنە بايلانىستى وقيعانىڭ سالدارىمەن كۇرەس جۇمىستارىن توقتاتۋ قاجەت بولدى، دەيدى ۆان- زاند (تەحاس شتاتى) وكرۋگىنىڭ اتقارۋشى بيلىگىنىڭ باسشىسى دون كيركپاتريك. ء«بىز قۇتقارۋشىلارمەن بىرگە جۇمىستاردى جالعاستىرۋعا تىرىسامىز جانە تورنادو قايتالانعان جاعدايدا ول تۋرالى حالىقتى حاباردار ەتەمىز»، - دەدى ول. اركانزاس شتاتىنان ايەل ازاماتتىڭ قايتىس بولعانى جونىندە حابار كەلىپ ءتۇستى.
ونىڭ ۇيىنە جەلدىڭ كۇشىنە شىداي الماعان اعاش قۇلاعان. تاعى ءبىر ازامات ميسيسيپيدىڭ ورتالىق بولىگىندە مەرت بولعان. ازىرگە قايعىلى جاعدايدىڭ سەبەپ- سالدارى ايتىلماي وتىر. وسىعان دەيىن ءبىر ادامنىڭ ميسسۋري شتاتىنداعى نوسەر جاڭبىردان كەيىن بولعان سۋ تاسقىنىنىڭ سالدارىنان كوز جۇمعاندىعى ايتىلعان بولاتىن. سونداي- اق وكلاحوما شتاتىندا دا سۋ تاسقىنىنڭ سالدارىنان ەلەكتر جەلىلەرى ءۇزىلىپ، كولىك قوزعالىسى شەكتەلدى. اتالعان شتاتتاردا توتەنشە جاعداي جاريالاندى. ميسسۋري شتاتىنىڭ گۋبەرناتورى ەريك گرەيتەنس سەنبى كۇنى اپات بولعان ايماقتاردى ارالاپ كوردى.
«مەن ميسسۋري تۇرعىندارىنىڭ بارلىعىن وتكەن تۇندە تابيعات اپاتىنان زارداپ شەككەندەردىڭ جاعدايىنىڭ وڭالۋىن تىلەۋدى سۇرايمىن. شتاتتىڭ بارلىق ايماعىنداعى تۇرعىندار جىلدامدىعى سەكۋندىنا 67,9 مەتردى قۇرايتىن اياق استىنان بولعان مىقتى جەلدىڭ كۇشىنە تاپ بولدى»، - دەدى ول.
اۋدارما: ايدار وسپاناليەۆ
