وڭتۇستىك قازاقستاندا «تابليعي جاماعات» ۇيىمىنىڭ 7 مۇشەسى ءدىني ناسيحات جۇرگىزگەنى ءۇشىن سوتتالدى - فوتو
دەپ حابارلايدى قازاقپارات ح ا ا ءتىلشىسى.
سايرام اۋداندىق سوتىنىڭ سۋدياسى سالتانات قابىلوۆا ءبىر جارىم ساعات كولەمىندە ۇكىم وقىپ، توپتىڭ جەتەكشىسى مەن ونىڭ كومەكشىسىن 4 جىلعا باس بوستاندىعىنان ايىردى. ولار جازالارىن جالپى تارتىپتەگى كولونيادا وتەيتىن بولادى. بۇعان دەيىن كەپىل تۇرىندەگى بۇلتارتپاۋ شاراسىمەن جۇرگەن ايىپتالۋشىلار سوت زالىنان قاماۋعا الىندى. قالعان بەس ادامنىڭ قولىنا دا بۇگىن كىسەن سالىنىپ، ولار ءبىر جىل مەرزىمگە باس بوستاندىعىنان ايىرۋ جازاسىنا كەسىلدى. جازالارىن قونىس كولونياسىندا وتەيتىن بولدى.
ايتا كەتەيىك، بۇگىن سوتتالعان توپ مۇشەلەرى 2000 -جىلداردان بەرى تەرىس اعىمنىڭ جەتەگىندە جۇرگەن.
«توپ جەتەكشىسى مەن ونىڭ كومەكشىسى «تابليعي جاماعات» اعىمىن تەرەڭ ءبىلىپ، وقۋ ءۇشىن ءۇندىستان مەن پاكىستانعا بارعان. كەيىننەن تەرىس اعىمنىڭ ورتالىعى سانالاتىن بانگلادەش مەملەكەتىندە 4 اي كولەمىندە ءبىلىمىن شىڭداپتى. قالا بەردى كورشى قىرعىزستان ەلىندەگى جاماعات مۇشەلەرىمەن بايلانىس ورناتىپ، تاجىريبە جيناقتاعان. سول جاقتان تيىم سالىنعان ادەبيەتتەر اكەلىپ، سايرام اۋدانىندا ۇگىت- ناسيحات جۇرگىزگەن. قارابۇلاق، قاراسۋ اۋىلدارىنداعى نامازحانالار مەن مەشىتتەرگە جينالعان حالىققا تەرىس اعىمدى ۋاعىزداعان. كەيىننەن بەلگىلى ءبىر توپ، ياعني جاماعات قۇرىپ، ۇيلەرىندە دە ناسيحات جۇرگىزگەن»، - دەدى سۋديا س. قابىلوۆا.
ەكەۋىنە قاتىستى استانا قالالىق سارى ارقا اۋداندىق سوتى وسى قىزمەتى ءۇشىن ءتيىستى جازا تاعايىنداعان. سوعان قاراماستان سوتتالعان توپ جەتەكشىسى مەن كومەكشىسى اعىمداعى قىزمەتتەرىن توقتاتپاپتى. كەرىسىنشە وزگە وبلىستارعا شىعىپ، ول جاقتان كەلگەن جاماعاتتى شاقىرىپ، ناسيحات شارالارىن توقتاتپاعان. سوت الدىندا جاۋاپ بەرگەن توپتىڭ بەس مۇشەسى دە «تابليعي جاماعات» ۇيىمىنىڭ قىزمەتىنە ەلىمىزدە تيىم سالىنعانىنا قاراماستان، بەلسەندىلىك تانىتقان. ۋاعىزدارىن تىڭداۋعا قاتىسىپ، كىتاپتارىن تاراتۋمەن اينالىسىپ ءجۇرىپتى. ءبىراق وتكەن جىلدىڭ قاراشا ايىندا ەلىمىزدىڭ ۇلتتىق قاۋىپسىزدىك كوميتەتى توپ مۇشەلەرىن قولعا ءتۇسىردى. ولاردىڭ ۇستىنەن قىلمىستىق كودەكستىڭ 405-بابىمەن ءىس قوزعالىپ، تەرگەۋ جۇرگىزىلدى. قىلمىستىق ارەكەتتەرى تولىعىمەن دالەلدەنىپ، ءىس جەلتوقسان ايىندا سايرام اۋداندىق سوتىنا وتكەن ەدى.
اۆتور: اينۇر اقبايەۆا
