قۇلاعان تىكۇشاقتان قۇربان بولعاندار سانى 7 ادامعا جەتتى
قالا باسشىسىنىڭ ءسوزىن NTV تەلەارناسى كەلتىردى دەپ جازادى ر ي ا نوۆوستي اگەنتتىگى.
كادير توپباشتىڭ ايتۋىنشا، اۋە اپاتى ورىن العان جەردە ەكى ۇشقىشتىڭ مايىتتەرى تابىلدى. ولاردىڭ ەكەۋى دە تۇرىك. «ەدجزادجىباشى» كومپانياسىنا تيەسىلى Sikorsky S-76 تىكۇشاعى ىستانبۇل قالاسىنىڭ ماڭىنداعى بيۋيۋكچەكمەدجە ەلدى مەكەنىندە اپاتقا ۇشىرادى. تىكۇشاق قويۋ تۇماندى جاعدايدا تەلەمۇنارامەن سوقتىعىسقان.
بورتتا 7 ادام بولعان. الدىندا وسى وقيعانىڭ سالدارىنان 5 ادامنىڭ مەرت بولعاندىعى جانە ولاردىڭ 4 ءۋى رەسەي ازاماتتارى ەكەندىگى حابارلانعان. تۇرىك بۇقارالىق اقپارات قۇرالدارى وكىلدەرىنىڭ حابارلاۋىنشا، تىكۇشاقتى ۇشقىشتار الااددين ادجار مەن احمەت بۋلۋت باسقارعان.
سونىمەن قاتار تىكۇشاقتا قۇربان بولعان جولاۋشىلاردىڭ ەسىمدەرى اتالدى. ولار: VitrA كومپانياسىنىڭ باس ديرەكتورى، «ەدجزادجىباشى» كومپانياسىنىڭ رەسەيلىك ءبولىمىنىڭ باسشىسى ساليم وزەن مەن الەكساندر ۆانين، يگور كوچەرگين، ليۋدميلا چۋپروۆا جانە ەلەنا بادراگان.
وسىعان دەيىن Milliyet باسىلىمى ۇشقىشتاردىڭ بۇل ايماقتان ءجيى ۇشاتىنىن، وسىعان قاراي ولاردىڭ مۇنارانىڭ قايدا ورنالاسقانىن جاقسى بىلەتىندىگىن جازدى. باسىلىمنىڭ مالىمەتتەرىنشە، بيىكتىگى 257 مەتر بولاتىن مۇنارا كارتادا دا ۇلكەن بەلەستەردىڭ ءبىرى رەتىندە كورسەتىلگەن.
