كۇيەۋىنەن 7 جاس ۇلكەن كەلىنشەك بالاسىنىڭ ەرەسەك ايەلگە تۇرمىسقا شىعۋىنا قارسى

استانا. قازاقپارات - اسەل كارىپوۆا وزىنەن 7 جاس كىشى ازاماتقا تۇرمىسقا شىققان.

الايدا ول ءوزىنىڭ بالاسىنىڭ نەمەسە باۋىرىنىڭ وزىنەن ۇلكەن ايەلگە تۇرمىسقا شىعۋىنا قارسى بولاتىنىن جەتكىزدى.

بۇل تۋرالى «پەندەمىز عوي» باعدارلاماسىندا ايتىلدى.

كۇندەلىكتى اسەل كۇيەۋى جۇمىستان كەلەردە تاماعىن ازىرلەپ، تاعاتسىزدانا كۇتەدى. وتكەن ءبىر كۇننىڭ اڭگىمەسىن كەشكە ساعاتتاپ ءبىر- بىرىمەن بولىسەدى. الايدا العاش جاستاردىڭ نەكەگە تۇرۋىنا جاقىندارى قارسى بولعان ەكەن.

«باسىندا وتباسىلارىمىزدىڭ قارسى بولعانى راس. ارامىزدا بالا پايدا بولعاننان كەيىن رەنىش ۇمىتىلدى. ادامدى شىن سۇيگەن كەزدە ەشكىمدى تىڭدامايسىڭ. انام «ءوزىڭ ءبىل! باقىتتى بولساڭ بولدى» دەدى»، - دەيدى اسقاربەك ەسەنقايىر. قوس عاشىق وسىدان 6 جىل بۇرىن جەلى ارقىلى تانىسقان. نەبارى ەكى ايدان كەيىن ولار ازاماتتىق نەكەدە تۇرا باستاعان.

«تۇرمىسقا شىققانىما بيىل 5 جىل بولدى. ەكەۋىمىز «اگەنت» جەلىسى ارقىلى تانىستىق. ياعني بەس جىل بۇرىن تانىسىپ، ارادا ەكى اي وتكەن سوڭ بىرگە تۇرا باستادىق. تەك ءبىر جىلدان كەيىن عانا زاڭدى نەكەگە تۇردىق. اتالعان جەلىدەن ول ماعان دوستىق جىبەردى. ەكەۋىمىز ءبىر جۇماداي سويلەسىپ جۇردىك. ول كەزدەسۋگە ۇسىنىس جاسادى. الايدا مەنىڭ قولىم تيمەدى. تۋرا ءبىر جۇمادان كەيىن مەن تويدان كەش شىعىپ، ول مەنى ۇيگە دەيىن اپارىپ تاستادى. العاشقى كەزدەسۋىمىز 15-20 مينۋتقا عانا سوزىلدى. ءبىر-بىرىمىزگە ۇناعان سياقتى بولدىق. كەلەسى كۇننەن باستاپ كۇندە كەزدەستىك. ءوزىمىزدى باقىتتى جانۇيالاردىڭ قاتارىنا قوسامىز. قارىم-قاتىناسىمىز وتە جاقسى. ول كىسى ۇنەمى جۇمىستا جۇرەدى. سول سەبەپتى بۇگىنگى ستۋدياعا كەلە الماي قالدى»، - دەيدى اسەل كارىپوۆا.

جىگىتتىڭ تۋىسقاندارىنىڭ قارسى بولۋلارىنىڭ سەبەبى بار. سۇيگەنى اسەل بىرنەشە جاس ۇلكەن. دەسە دە، بۇل ەكى جاستىڭ شاڭىراق كوتەرۋىنە كەدەرگى بولا المادى.

«ول «مەن دايىنمىن. بۇل - مەنىڭ شەشىمىم. سەن ماعان ۇنايسىڭ. سول سەبەپتى بىرگە بولامىز» دەدى. قازىر قارىم-قاتىناسىمىز جاقسى. ولاردان ءسوز ەستىپ، قاباق تۇيگەنىن كورگەن ەمەسپىن. جاقسى وتىرىپ، ءبىر- بىرىمىزبەن جاقسى سويلەسەمىز. ءدال وسى ادامدى جولىقتىرىپ، وسى اداممەن تۇرمىس قۇرعانىما ريزامىن. ونىڭ جانىندا ايەل باقىتىن سەزىنەمىن. مەن ودان 7 جاسقا ۇلكەنمىن. مەنىڭ تۋىسقاندارىم ەشقانداي قارسىلىق بىلدىرگەن جوق. مەن باسىندا «سەن بىرگە تۇرۋعا دايىنسىڭ با؟ ەرتەڭ سەنىڭ بارلىق تۋىسقانىڭ مەنىمەن بولۋىڭا قارسى بولادى. ويتكەنى ارامىز 7 جاس» دەپ ايتتىم. جەكە ءوزىم بالام نەمەسە باۋىرىم وزىنەن ۇلكەن ايەلگە ۇيلەنسە قارسى بولاتىن ەدىم. بۇل بارلىعىنا بىردەن ۇنايدى دەپ ويلامايمىن. ال كۇيەۋىمنىڭ تۋىسقاندارى قارسىلىعىن اشىق تۇردە بىلدىرگەن ەمەس. قارىم- قاتىناسىمىز وتە جاقسى.

مەن ولاردى سىيلايمىن، ولار دا ماعان جاقسى قارايدى. ارينە، مۇنداي سيتۋاتسياعا قازىر باسقاشا قارايمىن. سەبەبى، باسىمنان ءوتتى. ءبىراق باستاپقىدا قارسى بولاتىنىم انىق. جاس بالامنىڭ وزىمەن جاستى سەرىك تاپقانىن قالايمىن. ادامدى الدىمەن ءبىلىپ الۋ كەرەك. جولداسىم «مەنىڭ جانىمدا قازىر جاس قىز بولسا، قالاي ءومىر سۇرەتىنىمدى بىلمەيمىن. سەن اقىلدىسىڭ، ءبارىن بىلەسىڭ» دەپ ايتادى. ۇيدە ءبىرىنشى شەشىمدى جولداسىم قابىلدايدى. جاسىم ۇلكەن بولسا، ءبىرىنشى كەزەكتە جولداسىمدى سىيلاپ، ەر ادام رەتىندە قۇرمەتتەيمىن. شەشىمدەردى نەگىزىنەن ول كىسى قابىلدايدى. اراسىندا اقىل ايتىپ وتىراتىن كەزدەرىم دە بولادى. كوبىنەسە ول كىسىنىڭ ايتقان سوزدەرىنە قارسى كەلمەيمىن. عاشىقتاردىڭ جاسىنان بولەك، ولار بىرگە تۇرا باستاعان كەزدە ءتۇرلى قيىنشىلىق بولادى. ونىڭ بارلىعىنان ءبىز وتتىك، شەشىم تابا الدىق. قازىر ءبىر-ءبىرىمىزدى ءسوزسىز تۇسىنەمىز»، - دەيدى اسەل حانىم.

اسەلدىڭ جەكە بيزنەسى بار. ال جولداسى مەملەكەتتىك قىزمەتتە. شاڭىراق قۇرعالى 6 جىلدىڭ وتكەنىن بايقاماعان ولار «قۇددى كەشە تانىسقاندايمىز» دەيدى. قازىر ولاردىڭ مانسۇر ەسىمدى ۇلدارى بار. جاسى ۇشتە. اسقاربەك پەن اسەلدىڭ ەندىگى ارمانى - كوپبالالى اتا-انا اتانۋ. بۇل وتباسى «ماحاببات جاسقا قارامايدى» دەگەن پىكىرمەن تولىق كەلىسەدى.