الماتىدا جىراۋلار شىعارماشىلىعىنداعى 7 عاسىرلىق ەل تاريحى ايتىلدى
«قازاق جىراۋلارى جىرلاعان 700 جىلدىق ەل تاريحى» رەسپۋبليكالىق عىلىمي- تەوريالىق كونفەرەنتسيا ق ر تاۋەلسىزدىگىنىڭ 25 جىلدىعى مەن الماتى قالاسىنىڭ 1000 جىلدىعى اياسىندا ءوتتى.
جيىندى ق ر ج و و قاۋىمداستىعى، قالالىق اكىمدىك ۇيىمداستىردى.
ءسوز العان تاريحشى، ادەبيەتتانۋشى عالىمدار 14- عاسىرداعى سىپىرا جىراۋدان كەشەگى ماحامبەت، ءسۇيىنبايلارعا دەيىنگى جىر تارلاندارى جىراۋلار اۋلەتىنىڭ شىعارماشىلىعى تۋرالى زەرتتەۋ جۇمىستارىمەن، تىڭ دەرەكتەرىمەن ءبولىستى.
«قازاق حاندىعى شاڭىراق كوتەرىپ الەم تاريحىنان ورىن الۋىنا كەرەي مەن جانىبەكتىڭ ەتكەن ەڭبەگى قانداي زور بولسا، سونداي ەرەن قۇبىلىستى ءدال قالپىندا بەينەلەگەن جىراۋلار شىعارماشىلىعىنىڭ ماڭىزى دا سونشالىقتى. اتالعان تاريحي تۇلعالاردىڭ ءىس ارەكەتى 15-16 -عاسىرلاردا ءىرى تاريحي وقيعالارمەن بايلانىستى بولسا، ولار تۋرالى جىراۋلار ءدال باعا بەرىپ وتىرعان. وسى ورايدا سۇڭعىلا شەشەندىكتىڭ ارقاسىندا حاننىڭ مىسىن باسىپ، حالىق تىلەگىن جەتكىزەتىن جىراۋلار ەدى. حاندىق داۋىردەگى جىراۋلار شىعارماشىلىعىنىڭ ءبىر ەرەكشەلىگى - ولاردا كەزدەسەتىن فولكلور ۇلگىلەرى، اڭىزدار تاريحتا بولعان جايتتارمەن تىعىز بايلانىستى.
جىراۋلار شىعارمالارىنداعى كەيىپكەرلەر ەل تاريحىنداعى ەلەۋلى تۇلعالار بولىپ كەلەدى. ءار جىراۋ ءوز زامانىنىڭ تامىرىن ءدوپ باسقان. مىسالى سىپىرا جىراۋدىڭ جىرلارىندا شىڭعىس حان، ءامىر تەمىر ەسىمدەرى كەزدەسسە، قازاق حاندىعىنىڭ داۋىرىندەگى جىراۋلاردا ابىلاي، كەرەي مەن جانىبەك اتتارى كەزدەسەدى. اسان قايعى شىعارمالارىنىڭ باس وبەكتىسى - ءاز جانىبەك» ، - دەدى م. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى، ق ر ۇلتتىق عىلىم اكادەمياسىنىڭ مۇشە- كوررەسپوندەنتى ءۋاليحان قاليجانوۆ.
ءال-فارابي اتىنداعى قازاق ۇلتتىق ۋنيۆەرسيتەتى فيلولوگيا جانە الەم تىلدەرى فاكۋلتەتىنىڭ پروفەسسورى، فيلولوگيا عىلىمدارىنىڭ دوكتورى جۇمات تىلەپوۆ 14-19 -عاسىرلارداعى جىراۋلار مۇراسى تۋرالى تىڭ دەرەكتەرىمەن ءبولىستى.
اۆتور: گۇلميرا عوسمانالي
