ۇلى ابايدىڭ 7-ۇرپاعى - حالىقارالىق وليمپيادا جەڭىمپازى

استانا. قازاقپارات - الماتىلىق 15 جاستاعى وقۋشى دانا اقىلبايەۆا ورىس ءتىلى ءپانى بويىنشا ماسكەۋدە وتكەن حالىقارالىق وليمپيادانىڭ جەڭىمپازى اتانىپ، رەسەي فەدەراتسياسىنىڭ ءوزى قالاعان جوعارعى وقۋ ورنىندا تەگىن ءبىلىم الاتىن بولدى.

29 ەلدەن كەلگەن 200 دەن استام وقۋشىنىڭ اراسىندا ابسوليۋتتى جەڭىمپاز اتانعان دانا - ۇلى ابايدىڭ جەتىنشى ۇرپاعى.

XIII حالىقارالىق وليمپيادانىڭ ابسوليۋتتى جەڭىمپازى اتانىپ كەلگەن دانا العاشقى قۋانىشىن ۇستازى نينا الدونوۆامەن ءبولىستى. ورىس ءتىلى مەن ادەبيەتىنىڭ قىر-سىرىن ۇيرەتىپ قانا قويماي، جەتىستىككە جەتۋىمە سەبەپكەر بولعان دا ۇستازىم دەيدى 15 جاسار وقۋشى.

نينا الدونوۆا، پانفيلوۆ اتىنداعى قازاقستان-رەسەي مەكتەپ-گيمنازياسىنىڭ مۇعالىمى:

- جوق، بۇل - بىرلەسكەن ەڭبەك. سەبەبى وقۋشىدا قانداي دا ءبىر نەگىز بولماسا، ونى جەتەلەۋ قيىنعا سوعار ەدى. ال دانا - وتە سەزىمتال ءارى لوگيكالىق ويى جۇيەلى شاكىرت. ونىڭ ادەبيەتكە جاقىندىعى جانىنىڭ سۇلۋلىعىن تانىتادى. بۇل بايقاۋ ونىڭ جۇلدىزدى ءساتى بولدى. بەس جىلدا ءبىر وتەتىن حالىقارالىق وليمپياداعا الەمنىڭ 29 ەلىنەن 205 وقۋشى قاتىسىپتى. 30 مەملەكەت ۋكراينا بولاتىن.

الايدا ەلدەگى ساياسي تەكەتىرەستەرگە بايلانىستى ءوز زامانداستارىنىڭ شەكارادان وتە الماۋىن دانا وليمپيادا تاپسىرماسى بويىنشا «دوستىق» تاقىرىبىندا بەرىلگەن مازمۇنداماسىنىڭ سوڭىندا نازدانا جازعان ەكەن.

رەسەي فەدەراتسياسىنىڭ ءبىلىم جانە عىلىم مينيسترلىگى ۇيىمداستىرعان بايقاۋدىڭ ەكىنشى سۇراعى «مەملەكەت جانە ونەر» جايىندا بولعان. كوركەمسۋرەت مەكتەبىن ءتامامداعان دانا اقىلبايەۆا ءۇشىن بۇل دا قيىنعا سوقپاعان. ونەرگە، تىلگە، جانى سۇلۋلىققا ءارى بەيبىتشىلىككە قۇمار قىز كەيىن بىلگەنىمىزدەي ۇلى ابايدىڭ اقىلبايدان تاراعان ۇرپاعى بولىپ شىقتى.

دانا اقىلبايەۆا، حالىقارالىق وليمپيادانىڭ ابسوليۋتتى جەڭىمپازى:

- ءيا، جەتىستىككە جەتۋىمە اباي اتامنىڭ رۋحى دەم بەرگەن شىعار. دەگەنمەن، مەن ۇلى ابايدىڭ ۇرپاعىمىن دەپ ايقايلاپ ايتا بەرۋدى ءجون كورمەيمىن. ول ءۇشىن ءالى كوپ ەڭبەك ەتىپ، تالاي اسۋلارعا جەتۋىم كەرەك. ال بۇل جولى راس، مەن كوپ وقىدىم، كوپ ىزدەندىم. حالىقارالىق وليمپيادانىڭ ابسوليۋتتى جەڭىمپازى دەپ مەنىڭ اتىمدى اتاعاندا قۋانىشىمدا شەك بولمادى. «يا» -  يازىك، ياعني، «ءتىل» دەگەن ماعىنانى بىلدىرەتىن ەسكەرتكىش داناعا رەسەي فەدەراتسياسىنىڭ قالاعان جوعارعى وقۋ ورنىندا تەگىن ءبىلىم الۋىنا مۇمكىندىك بەرىپ وتىر. 9-سىنىپتى ءبىتىرىپ، 10-سىنىپقا اياق باسقان ول كەلەر جىلدى ەكستەرن ءبىتىرىپ، ارعى جىلى ماسكەۋدىڭ حالىقارالىق قاتىناستار ينستيتۋتىنا ءتۇسۋدى ماقسات ەتىپ وتىر.

اۆتورلارى: الۋا ماحانبەت، اعابەك قازانباي

24.kz