وقۋلىقتار 79 پايىز سيفرلىق فورماتقا كوشىرىلدى
«مەملەكەت باسشىسىنىڭ وقۋ پروتسەسىن سيفرلاندىرۋ اياسىندا پاندەردى وقىتۋدىڭ يننوۆاتسيالىق تاسىلدەرىن ەنگىزۋ، قاجەت وقۋ ماتەريالدارىن سيفرلىق فورماتقا كوشىرۋ تاپسىرماسىنا سايكەس، پەداگوگتەرگە سيفرلىق وقۋ ماتەريالدارىن ءتيىمدى پايدالانۋدى، يننوۆاتسيالىق تاسىلدەردى قولدانۋدى ۇيرەتۋ، سيفرلىق وقۋ ماتەريالدارىن كەڭەيتۋ، مەكتەپىشىلىك جانە ۇلتتىق سىرتقى باعالاۋدى سيفرلىق فورماتقا كوشىرۋ، سونداي- اق مەكتەپتەردى تەحنيكالىق قۇرالدارمەن جانە جوعارى جىلدامدىقتى ينتەرنەتپەن قامتۋ مىندەتتەرى ىسكە اسىرىلىپ كەلەدى»، - دەدى مينيستر.
ونىڭ اتاپ وتۋىنشە، بۇعان قاجەت تالاپتار مەن ەرەجەلەر مينيسترلىكتىڭ 6 نورماتيۆتىك-قۇقىقتىق اكتىلەرىندە ناقتى بەكىتىلگەن. اتالعان زاڭنامالارعا سايكەس قازىرگى تاڭدا ءبىلىم جۇيەسىن سيفرلاندىرۋ جۇمىستارى كەشەندى ءارى جۇيەلى تۇردە جۇرگىزىلۋدە.
«وقۋ پروتسەسىن باسقارۋدى سيفرلاندىرۋ ماقساتىندا رەسپۋبليكا بويىنشا 7 مىڭ مەكتەپتە ەلەكتروندىق جۋرنالدار مەن كۇندەلىكتەردى جۇرگىزۋ، باعالاۋ، ءۇي تاپسىرماسىن بەرۋ، جوسپار قالىپتاستىرۋ جانە قاشىقتان وقىتۋ سياقتى نەگىزگى قىزمەتتەردى قامتيتىن ءبىلىم بەرۋ پلاتفورمالارى ەنگىزىلدى. سونىمەن قاتار، بۇل پلاتفورمالاردىڭ وقۋشىلار مەن ۇستازدارعا ارنالعان ءموبيلدى قوسىمشالارى، اناليتيكالىق باقىلاۋ تاقتالارى، مەكتەپتەگى اس ءمازىرى جانە ونلاين بىلىكتىلىكتى ارتتىرۋ كۋرستارى سەكىلدى قوسىمشا قىزمەتتەرى ىسكە قوسىلعان. قازىرگى تاڭدا وقۋلىقتاردىڭ 79 پايىز سيفرلىق فورماتقا كوشىرىلىپ، مەملەكەتتىك ساراپتامادان ءوتتى جانە وقۋلىقتار تىزىمىنە كىردى»، - دەدى ول.
