الەمنىڭ ۇزدىك ۋنيۆەرسيتەتتەرىنىڭ 77 وقۋلىعى قازاق تىلىنە اۋدارىلدى
ءبىلىم جانە عىلىم مينيسترلىگىنىڭ مالىمەتىنشە، جاڭا وقۋ جىلى قارساڭىندا وقۋلىقتار ەلىمىزدىڭ بارلىق جوعارى وقۋ ورىندارىنا جەتكىزىلگەن. تاعى 23 وقۋلىقتى باسىپ شىعارۋ جانە تاراتۋ بويىنشا جۇمىستار جالعاسىپ جاتىر.
100 شەتەلدىك وقۋلىقتى قازاق تىلىنە اۋدارۋ «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى شەڭبەرىندە جۇرگىزىلگەن. اتالعان جوبانىڭ جۇمىسى قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ تاپسىرماسى بويىنشا 2017 -جىلى باستالعان. بارلىق وقۋلىق جوعارى وقۋ ورىندارىنداعى وقۋ پروتسەسىندە، سونىڭ ىشىندە جۇمىس باعدارلامالارىن ازىرلەۋ، الەۋمەتتىك- گۋمانيتارلىق باعىتتاعى پاندەر بويىنشا دارىستەر وقۋ، ستۋدەنتتەر مەن پەداگوگتاردىڭ عىلىمي- زەرتتەۋ جۇمىسىندا پايدالانىلاتىنىن ايتا كەتكەن ءجون.
وسىلايشا بۇل جوبا قازاقستاندىق ستۋدەنتتەرگە ۇزدىك الەمدىك ۇلگىلەر نەگىزىندە وقۋعا مۇمكىندىك بەرەدى. ياعني، ستۋدەنتتەردىڭ تاريح جانە ساياساتتانۋ، الەۋمەتتانۋ جانە فيلوسوفيا، پسيحولوگيا، پەداگوگيكا، ەكونوميكا، مادەنيەتتانۋ جانە فيلولوگيا عىلىمدارى سالاسىنداعى زاماناۋي ترەندتەرگە سايكەس ءبىلىم الۋى ءۇشىن جاعداي جاسالعان.
وقۋلىقتار 100kitap.kz جانە openu.kz سايتتارىندا جاريالانعان. سونىمەن قاتار اۋدارىلعان وقۋلىقتار بويىنشا قازاق جانە ورىس تىلدەرىندەگى ۆيدەوكۋرستار ازىرلەنىپ، OpenU.kz پورتالىندا ورنالاستىرىلعان.
اۆتور: گۇلزات اقجولوۆا
