قوستانايلىق 77 جاستاعى ارداگەر گىر كوتەرۋدەن الەم چەمپيوناتىندا توپ جاردى - فوتو
وسى ءۇش التىن جۇلدەنىڭ ارقاسىندا ارداگەردىڭ قورجىنىنداعى مەدالدار سانى 129 عا جەتتى. بۇل تۋرالى قازاقپارات حابارلايدى.
بۇگىنگى كۇنگە دەيىن قاريا 81 حالىقارالىق جارىسقا قاتىسىپ، ازيا، الەم، ەۆروپا چەمپيوناتتارىندا 77 التىن مەدال يەلەنگەن. جالپى، قورجىنىنداعى 129 مەدالدىڭ 120 سى التىن، جەتەۋى كۇمىس، ەكەۋى قولا جۇلدە.
«بالا كەزىمدە مەن ءالجۋاز، اۋرۋشاڭ بولدىم. سوسىن 13 جاسىمدا كىتاپحاناعا بارىپ، يممۋنيتەتتى ارتىرۋ تۋرالى كىتاپتار وقي باستادىم. كەيىن تەحنيكالىق كوللەدجدى ءبىتىرىپ، جۇمىس ىستەدىم. ءبىراق، جان- دۇنيەم ۇنەمى سپورتقا اۋىپ تۇردى»، - دەيدى ول.
كەيىن قالادا اشىلعان پەداگوگيكالىق ينستيتۋتتىڭ دەنەشىنىقتىرۋ فاكۋلتەتىنە وقۋعا ءتۇسىپ، اۋىر اتلەتيكادان العاشقى جارىستارىنا قاتىسا باستايدى. كەيىن باپكەر بولىپ تا شاكىرت تاربيەلەيدى. 1999-2008 -جىلدارى گىر كوتەرۋ سپورتىنان وبلىستا اعا باپكەر، گىر سپورتى جانە ارمرەستلينگ وبلىستىق فەدەراتسياسىنىڭ باسشىسى بولىپ قىزمەت ەتەدى. 2009 -جىلى ول باپكەرلىكتەن كەتىپ، بار ۋاقىتىن ءوزىنىڭ دەنە دايىندىعىنا جۇمسايدى.
«سالاۋاتتى ءومىر سالتىن ۇستانىپ، جاستارعا ۇلگى بولعىم كەلدى. ال جاقىندا بەلارۋسيادا وتكەن جارىسقا ءارتۇرلى مەملەكەتتەن 35-90 جاس ارالىعىنداعى 300 گىر كوتەرۋشى كەلدى»، - دەيدى الەكساندر اقساقال.
سايىس بارىسىندا قاريا سەرپە كوتەرۋگە 115, جۇلقا كوتەرۋدە 141 رەت گىر تاسىن توبەسىندە ويناتادى. وسىلايشا وتانداسىمىز 75 جاستان اسقاندار اراسىندا ۇزدىك شىعىپتى. «جەڭىسكە جەتىپ، ءوز ەلىڭنىڭ ءانۇرانىن تىڭداۋ ەرەكشە باقىت» دەيدى ول. قاريانىڭ باسىنان قيىن ساتتەر دە وتكەن. 2010 -جىلى ول ءبىرىنشى دەڭگەيلى قاتەرلى ىسىككە شالدىعادى.
«سپورتتىڭ ارقاسىندا مەن جىلدام قالپىما كەلىپ، اۋرۋدى جەڭدىم. ءبىر جىلدان سوڭ قايتادان جارىستارعا قاتىسا باستادىم. تابىسقا جەتۋ ءۇشىن تىنباي تەر توگىپ، ءجيى ازىلدەپ، كوڭىلدى ءجۇرىپ، ماقساتىڭا قاراي قادام باسۋىڭ كەرەك. 77 گە كەلسەم دە دەمالىپ وتىرعىم كەلمەيدى. بوس ۋاقىتىم جوق. باقشا دايىندايمىن، جاتتىعۋ جاسايمىن، قوعامدىق جۇمىستارعا ارالاسامىن»، - دەيدى ارداگەر.
