اماندىق باتالوۆ: «قورعاس - شىعىس قاقپاسى» ەركىن ەكونوميكالىق ايماعىندا 76 نىساننىڭ قۇرىلىسى اياقتالدى
كەشە بۇل جونىندە الماتى وبلىسىنىڭ اكىمى اماندىق باتالوۆ وبلىستىق ءماسليحات دەپۋتاتتارىنىڭ الدىنداعى ەسەبىندە ءمالىم ەتتى.
وبلىس اكىمىنىڭ ايتۋىنشا، «قۇرعاق پورتتىڭ» الەۋەتى وتە زور. بيىل مۇندا 200 مىڭ كونتەينەردى قابىلداۋ جوسپارلانعان. ال 2020 -جىلعا قاراي جىلىنا 500 مىڭ كونتەينەر وڭدەلەتىنى بولجانىپ وتىر.
ايتا كەتۋ كەرەك، ەلباسى نۇرسۇلتان نازاربايەۆ الماتى وبلىسىنداعى ساپارى بارىسىندا جاڭا «نۇركەنت» قالاسىن دامىتۋدىڭ باس جوسپارىمەن تانىسقان بولاتىن. «نۇركەنت» قالاسى «قورعاس - شىعىس قاقپاسى» ارنايى ەكونوميكالىق ايماعىنىڭ قۇرامىنا كىرەدى. بولاشاقتا بۇل قالادا 100 مىڭنان اسا ادام تۇراتىن، بولاشاعى زور ەكونوميكالىق ايماق بولادى دەپ كۇتىلۋدە.
سونداي- اق ءوڭىر باسشىسى ءماسليحات دەپۋتاتتارىنىڭ الدىنداعى ەسەبىندە سوڭعى 8 ايداعى كورسەتكىشتەرگە توقتالدى. اماندىق باتالوۆتىڭ ايتۋىنشا، ەسەپتى كەزەڭدە ونەركاسىپ سالاسىندا 400,1 ميلليارد تەڭگەدەن استام ءونىم ءوندىرىلدى. ونەركاسىپتە جاڭادان 34 نىسان ىسكە قوسىلىپ، جۇمىس ىستەپ تۇرعان 15 نىساندى كەڭەيتۋ ناتيجەسىندە قوسىمشا 1032 جۇمىس ورنى اشىلدى. بۇدان باسقا، «نۇرلى جول» ينفراقۇرىلىمدى دامىتۋدىڭ باعدارلاماسى شەڭبەرىندە تالدىقورعان قالاسىنىڭ وڭتۇستىك- باتىس تۇرعىن ءۇي الابىندا 5 ءۇيدى سالۋ جوسپارلانۋدا.
سامال قابىشيەۆا
