قازاقستاندىقتاردىڭ 75 پايىزى بالا تاربيەسىندە كۇش قولدانعاندى دۇرىس كورەدى - يۋنيسەف
دەپ حابارلايدى «قازاقپارات» ح ا ا ءتىلشىسى.
«قازاقستاندا 2016 -جىلى ءبىز (يۋنيسەف - اۆت.) ادام قۇقىعى جونىندەگى ۋاكىلمەن بىرىگىپ، اتالعان تاقىرىپتا زەرتتەۋ جۇمىستارىن جۇرگىزدىك. ونىڭ قورىتىندىسى قازاقستانداعى حالىقتىڭ 75 پايىزى بالالاردى تارتىپكە باعىندىرۋ ءۇشىن كۇش قولدانۋ ءادىسى دۇرىس دەپ ەسەپتەيتىنىن كورسەتىپ وتىر. ياعني، حالىقتىڭ جارتىسىنان كوبى وسىنداي پىكىردە. بۇل الەۋمەتتىك نورماعا اينالعاندىقتان، قوعامدا بالالارعا كۇش قولدانۋ قارىم- قاتىناسىنا سابىرلى كوزقاراستىڭ بارى سەزىلەدى»، - دەيدى يۋريي وكساميتنىي.
ونىڭ ايتۋىنا قاراعاندا، قازاقستاندىق بالالار ۇيىندە دە، مەكتەپ پەن ينتەرناتتا دا مۇنداي ماسەلەمەن بەتپە- بەت كەلىپ جاتادى. دەسە دە، يۋنيسەف وكىلى قازاقستاندا بالالاردىڭ قۇقىعىن قورعاۋ باعىتىندا جۇرگىزىلىپ جاتقان جۇمىسقا جوعارى باعا بەردى.
«قازاقستاندا بالالار قۇقىعى جونىندە قۇزىرلى ورگاننىڭ قۇرىلۋى بۇل باعىتقا تىڭ سەرپىن بەردى. بۇل جۇمىستا ءبىز اشىقتىققا، زور جاۋاپكەرشىلىك پەن تالدامالى تۇردەگى امالعا باسا دەن قويامىز. ەڭ جاقسىسى، وزەكتى ماسەلەلەردى شەشۋگە كەلگەندە قازاقستان قاشان دا اشىقتىق تانىتىپ كەلەدى»، - دەيدى يۋ. وكساميتنىي.
ول سونىمەن بىرگە، وتكەن جىلى يۋنيسەف ۇيىمىنىڭ جاھاندىق ەسەبى جاريالانعانىن، ونىڭ قورىتىندىسى بويىنشا، الەمدە 300 ميلليونعا جۋىق بالا ءوز ۇيىندە پسيحولوگيالىق قىسىمعا نەمەسە كۇش قولدانۋ جاعدايىنا تاپ بولاتىنىن ايتادى.
«زەرتتەۋ جۇمىستارى جۇرگىزىلگەن وتىزعا جۋىق ەلدە ءبىر جاستاعى 10 بالانىڭ التاۋى تاربيەلەۋ ءۇشىن كۇش قولدانۋ جاعدايىنا تاپ بولىپ جاتادى»، - دەيدى ول.
ەسكە سالا كەتسەك، ب ۇ ۇ بالالار قورى (يۋنيسەف) قازاقستاندا بالالارعا قارسى زورلىق- زومبىلىقتىڭ الدىن الۋ جانە زاڭعا تارتىلعان بالالاردىڭ ماسەلەلەرىن شەشۋ ءۇشىن ەكى كوممۋنيكاتسيالىق ناۋقاندى باستادى.
كوممۋنيكاتسيالىق جوبالار بالا تاربيەسى ماسەلەسىندە قوعام مەن اتا- انالاردىڭ تاجىريبەسىندەگى ءادىس- امالداردى، جايسىز الەۋمەتتىك نورمالاردى وزگەرتۋگە باعىتتالعان. ءبىرىنشى كوممۋنيكاتسيالىق ناۋقان جاس اتا- انالاردىڭ، سونداي- اق وسى ماسەلەگە كەلگەندە زورلىق- زومبىلىققا جول بەرمەۋ امالى بويىنشا قوعامنىڭ ءبىلىم- بىلىگىن ارتتىرۋدى كوزدەيدى. ال ەكىنشى ناۋقان زاڭعا تارتىلعان بالالاردىڭ قۇقىعىن قورعاۋعا باعىتتالعان. كوممۋنيكاتسيالىق ناۋقان قازاقستاننىڭ التى وبلىسىندا، اتاپ ايتقاندا، استانا مەن الماتى قالالارىندا، ش ق و، و ق و، اقتوبە، ماڭعىستاۋ، قىزىلوردا وبلىستارىندا باستالادى.
اۆتور: ايان بەكەن ۇلى
