كوپ قارجىعا سالىنعان 75 ۆەتەرينارلىق زەرتحانا قاڭىراپ بوس تۇر - نۇرسۇلتان نازاربايەۆ
«ماسەلەن 3 جىل بويى 4 ,4 ميلليارد تەڭگەگە سالىنعان 75 اۋداندىق ۆەتەرينارلىق زەرتحانالاردىڭ ەكىنشى قاباتتارى قاڭىراپ بوس تۇر. ءالى ەسىمدە، بۇرىنعى مينيستر (اۋىل شارۋاشىلىعى ءمينيسترى اسىلجان مامىتبەكوۆ) زەرتحانا بولماسا مالدى ساتا المايمىز دەدى. اقشانى بەردىك. مىنە، 75 ۆەتەرينارلىق زەرتحانا توقتاپ تۇر. اسقار (اۋىل شارۋاشىلىعى ءمينيسترى اسقار مىرزاحمەتوۆ) بايقايسىڭ با، ولار جۇمىس ىستەمەيدى. ءبىز قىرعىزداردان زەرتحانا سۇراپ وتىرمىز، ال وزىمىزدىكى توقتاپ تۇر»، - دەدى قازاقستان پرەزيدەنتى.
مەملەكەت باسشىسى 2016 -جىلدىڭ سوڭىندا جالپى قۇنى 20 ميلليارد تەڭگەنى قۇرايتىن الماتى- تالدىقورعان گاز قۇبىرىنىڭ سالىنعانىن ايتتى.
«ەسەپ كوميتەتىنىڭ مالىمەتىنشە، ول گاز تاراتۋ جەلىسىنىڭ بولماۋى سالدارىنان جۇمىس ىستەمەي تۇر. سولاي ما، اماندىق؟»، - دەپ سۇرادى نۇرسۇلتان نازاربايەۆ الماتى وبلىسىنىڭ اكىمى اماندىق باتالوۆتان.
«نۇرسۇلتان ءابىش ۇلى، 55 شاقىرىمىنا قارجى بولىنبەپ ەدى. وتكەن جىلى ءبولىنىپ، قازىر بىتىردىك. ءوزىمىز جەرگىلىكتى بيۋدجەتتەن 4 ميلليارد تەڭگە ءبولىپ، گاز تاراتۋ جەلىسىنىڭ ءبىرىنشى كەزەڭىن سالۋدامىز»، - دەدى وبلىس باسشىسى.
ءوز كەزەگىندە ەلىمىزدىڭ ەنەرگەتيكا ءمينيسترى قانات بوزىمبايەۆ تالدىقورعانعا گاز تارتۋ جۇمىستارى ەۋروپالىق قايتا قۇرۋ جانە دامۋ بانكى، «گازترانس ايماق» جانە جەكە قاراجات ەسەبىنەن جۇرگىزىلەتىندىگىن ايتتى.
«مۇنداي جوسپار بار. 2 جىلدىق ىشىندە بۇل جۇمىستى اياقتايمىز دەپ جوسپارلاۋدامىز. جالپى، گاز تاراتۋ جەلىسىنىڭ ءبىرىنشى كەزەڭىن بيىل اياقتاساق تالدىقورعانعا گاز بەرىلە باستايدى»، - دەدى مينيستر.
«ۇكىمەتكە مەملەكەت قاراجاتىنا نەمقۇرايلى، قىلمىستىق جولمەن قاراۋ فاكتىلەرىن انىقتاۋ ءۇشىن ارنايى كوميسسيا قۇرۋدى تاپسىرامىن»، - دەدى پرەزيدەنت.
اۆتور: مارلان جيەمباي
