الماتىلىق 75 جاستاعى سپورتشى بيىل بەسىنشى رەكوردىن ورناتپاقشى - فوتو

استانا. قازاقپارات - جان اتا ەسىمىمەن تانىمال 75 جاسار الماتىلىق سپورتشى بيىل 5- رەكوردىن ورناتپاق.

اقساقال «مەدەۋدەگى» باسپالداقپەن قولىمەن «ءجۇرىپ» كوتەرىلۋگە جانە قاشىقتىقتا تۇرىپ، كوزىمەن قاعازدى ورتەۋگە دايىندالىپ ءجۇر ەكەن.

جان اتا ءوزىنىڭ تۋعاننان ازان شاقىرىپ قويعان ەسىمىن كوپشىلىككە ايتپايدى. سەبەبى ول ەسىمنىڭ كەڭەس ۇكىمەتى كەزىندە اتقارعان ەڭبەگىنە قاتىستى جاسىرىن قالعانىن قالايدى.

اقساقال بارلىعى جەتى رەكورد ورناتپاقشى. اتاپ ايتقاندا، ول «مەدەۋگە» كوتەرىلەتىن اتاقتى باسپالداقپەن قولىمەن «ءجۇرىپ» بارماقشى. بۇدان باسقا، ول ادام بويىندا سوققىدان اۋىرۋ سەزىمىن ءۇش-بەس مەتر قاشىقتىقتا تۋدىرتا الاتىنىن كورسەتپەك. جانە قاشىقتا تۇرىپ كوزىمەن قاعازدى ورتەمەكشى.

قازىر اقساقال كادىمگى قىزىل كىرپىشتىڭ بەسەۋىن ءبىرىنىڭ ۇستىنە ءبىرىن قويىپ، ءبىر سوققىمەن سىندىرۋعا دايىندالىپ ءجۇر ەكەن.

جان اتا وسى جىلدىڭ قاڭتارىندا بەس كەلىلىك مەتاللدى جاتىپ سىعىمداپ كوتەرۋ جاتتىعۋىن 11111 رەت ورىندادى. سپورتشى بۇعان بەس ساعات ۋاقىتىن جۇمساعان ەدى. ەڭبەگى اقتالىپ، ساراپشىلار جان اتانىڭ ءۇشىنشى رەكوردىن مويىنداعان بولاتىن.

ول ءبىرىنشى رەكوردىن سوناۋ 1992-جىلى 4444 رەت وتىرىپ-تۇرۋ جاتتىعۋىن جاساپ ورناتقان.

وتكەن جىلى سپورتشى التى كەلىلىك اعاش كەسەگىن 9000 رەت باسىنان جوعارى كوتەردى. بۇعان سپورتشى 4 ساعات 22 مينۋت ۋاقىتىن جۇمسادى. كەلەسى رەكوردى شامامەن جارتى جىلدان كەيىن تىركەلگەن. جان اتا 3 ساعات 3 مينۋتتىڭ ىشىندە 5105 رەت وتىرىپ-تۇرۋ جاتتىعۋىن ورىنداعان.

75 جاستاعى سپورتشىنىڭ ماقساتى جاستارعا ۇلگى بولۋ. «شىنىقساڭ -  شىمىر بولاسىڭ» دەگەن قاعيدامەن ءومىر سۇرەتىن سپورتشى قىستىڭ سۋىعىندا وزەندەرگە شومىلىپ، شولاق شالبارمەن، جالاڭ اياق ساعاتتاپ جۇگىرەدى.

جان اتانى كوپشىلىك «رەنتگەن- ادام» دەپ اتاپ كەتكەن. سەبەبى ول ادامنىڭ سىرتىنان قاراپ، ىشكى قۇرىلىستارىنداعى دەرتىن انىقتاي الادى ەكەن.

«پسيحولوگيالىق كىتاپتاردى كوپ وقىدىم. سوندىقتان ادامنىڭ قىلىعى مەن كوزقاراسىنا، ارەكەتىنە قاراپ، ونىڭ مىنەزىن بىردەن تۇسىنەمىن. جانە جەتى جاسىمدا، وڭىمدە دەپ ايتايىن، اپپاق ساقالدارى جەرگە تيگەن جەتى اتا كەلدى. «بالام ۇرپاقتارىمىزدىڭ ىشىنەن سەنى تاڭدادىق. ۇلكەن قاسيەتكە يە بولاسىڭ. جامان جولدان اۋلاق ءجۇر» دەپ ەسكەرتتى. ءوزىم قورقىپ كەتتىم. بالامىن عوي ول كەزدە. مىنە وسىدان كەيىن ءتۇرلى دۇنيەلەردى الدىن-الا سەزەتىن بولدىم. كەي ادام وندايدى تۇسىنەدى، كەيبىرەۋلەر جامان قارايدى. سوندىقتان تەك تۋىستارىما عانا كەلەتىن قاۋىپتى الدىن الا ايتىپ وتىرامىن»، - دەيدى جان اتا.

Nur.kz