12:03, 14 - اقپان 2018 | GMT +5
ۇستالعان قايىرشىنىڭ قالتاسىنان 750 مىڭ دوللار شىقتى
استانا. قازاقپارات - شۆەتسياداعى ۋپپسالا قالاسىنىڭ پوليتسەيلەرى جاقىندا وزگەشە قايىرشىنى قولعا ءتۇسىردى، دەپ حابارلايدى The Times.
«جولعا جەتپەي تۇر» دەگەن سىڭايدا كوشەدەگى حالىقتان قايىر سۇراعان ونىڭ «تىلەنشىلىك ءادىسى» كۇدىك تۋدىرعان. ەگەر كوشەدەگى ادامدار سۇراعانىن بەرۋدەن باس تارتسا، ول قالا تۇرعىندارىنا مىنەز كورسەتىپ قورقىتا باستاعان.
جەرگىلىكتى پوليتسيا بولىمشەسى باسشىسىنىڭ ايتۋىنشا، ۇستالعان كۇدىكتىنى ءتىنتۋ بارىسىندا ونىڭ قوينى-قونىشىنان بۋما-بۋما بانكنوتتار توگىلگەن. «ىشكى قالتالارى تولى اقشا، قايىرشىنىڭ قالتاسىنان شىققان وسىنشاما كوپ باكنوتتارمەن ءبىرىنشى رەت كەزدەسىپ تۇرمىن»، - دەدى يالە پولياريەۆيۋس.
ۇستالعان «قايىرشىنىڭ» قالتاسىنان جالپى سوماسى 6 ميلليون كرون (750 مىڭ ا ق ش دوللارى) شىقتى. ول قالا تۇرعىندارىنان اقشا بوپسالادى دەگەن ايىپپەن قاماۋعا الىندى.
