الماتى وبلىسىندا قانت قىزىلشاسى بىتىك شىعىپ، ءار گەكتارىنان 750 سەنتنەرگە دەيىن ءونىم تۇسۋدە
جينالعان قانت قىزىلشاسى ءتۇبىرىنىڭ سالماعى 6,5 - 7 كەلى تارتۋدا.
قانت قىزىلشاسىن جيناۋ ناۋقانى ەندى باستالعانىنا قاراماستان، ناتيجەسى بۇگىننىڭ وزىندە كوڭىلدەن شىعۋدا. شارۋالاردىڭ ايتۋىنشا ءدال وسىنداي بىتىك ءونىمدى الماعالى ءبىراز ۋاقىت بولىپتى.
«اعىمداعى جىلى ءتۇسىم مول. ماسەلەن، ءبىر قانت قىزىلشاسىنىڭ سالماعى 6,5-7 ك گ. ءار گەكتاردان 700-750 سەنتنەردەن ءونىم الۋدى جوسپارلاپ وتىرمىز. ءبىز كوكسۋ قانت زاۋىتىنا قانت قىزىلشاسىنىڭ العاشقى پارتياسىن جىبەرىپ قويدىق»، - دەدى سارقان اۋدانى «اق قۇدىق» شارۋا قوجالىعىنىڭ باسشىسى سەرجان ەسىمجانوۆ.
ەستەرىڭىزگە سالا كەتسەك، ق ر پرەزيدەنتى نۇرسۇلتان نازاربايەۆتىڭ الماتى وبلىسىنا جاساعان ءىس ساپارى كەزىندە ايماققا قانت قىزىلشاسى بويىنشا بۇرىنعى اتاعىن قايتارۋ تاپسىرماسى قويىلعان بولاتىن. وسى ماقساتتا ءوڭىر باسشىلىعى سايكەسىنشە جۇمىستار جۇرگىزدى. قانت قىزىلشاسىن وسىرەتىن شارۋالارعا 240 ميلليون تەڭگە مەملەكەتتىك سۋبسيديا ءبولىپ، ارنايى تەحنيكا، ساپالى تۇقىم، جانار جاعارماي ساتىپ الۋلارىنا جاعداي جاسادى.
باستىسى ەسىل ەڭبەك ەش كەتپەي، بۇگىندە سونىڭ وڭدى ناتيجەسىن كورۋدەمىز. جالپى، وبلىس بويىنشا قانت قىزىلشاسى القابىنىڭ كولەمى 4 مىڭ گەكتاردى قۇرايدى. ەسكەلدى اۋدانىنداعى «حيلنيچەنكو جانە ك» سەرىكتەستىگىنىڭ وزىندە- اق ءتاتتى ءتۇبىر وسىرۋگە 187 گەكتار القاپ قاراستىرىلعان. وزگە شارۋاشىلىقتارداعىداي مۇندا دا جۇمىستىڭ 65 پايىزىن ارنايى تەحنيكا اتقارسا، قالعان جۇمىس كولەمى قول كۇشىمەن ىستەلۋدە. جۇمىستارعا 27 تەحنيكا، جۇمىلدىرىلعان. تاۋلىگىنە 12 گەكتار القاپتىڭ ءونىمىن جيناۋ ارقىلى بارلىق القاپتارداعى قانت قىزىلشاسىن ءۇش اپتانىڭ ىشىندە جيناپ ءبىتىرۋ جوسپارلانىپ وتىر. ءونىمنىڭ ساپاسى دا سايكەس بولۋى ءتيىس.
وسى سەرىكتەستىكتىڭ بريگاديرى ءنۇسىپحان كەرىمبەكوۆتىڭ ايتۋىنشا، ءدال بۇنداي ءونىم كولەمى سوڭعى ون جىلدا بولماعان.
ەلباسىنىڭ تاپسىرماسىنا سايكەس، بيىل وبلىس بويىنشا قانت قىزىلشاسى القابىنىڭ كولەمى كوبەيتىلىپ، 4 مىڭ گەكتار اۋماققا تۇقىم سەبىلدى. ونىڭ ىشىندە اقسۋ اۋدانى - 860 گ ا، قاراتال - 560 گ ا، سارقان - 730 گ ا، كوكسۋ - 830 گ ا، ەسكەلدى - 1000 گ ا جانە تالدىقورعان قالاسى 20 گ ا جەرگە قانت قىزىلشاسىن ەكتى.
بيىل كوكسۋ اۋدانىنداعى قانت زاۋىتى كۇردەلى جوندەۋدەن وتكىزىلىپ، قايتا ىسكە قوسىلدى. 28 - قىركۇيەك كۇنى كوكسۋ قانت زاۋىتى العاشقى قانت قىزىلشاسىن قابىلداي باستادى. العاش بولىپ قىزىلشانى سارقان، ەسكەلدى، اقسۋ اۋداندارىنىڭ شارۋاشىلىقتارى اكەلىپ، تاپسىردى.
زاۋىت باسشىلىعىنىڭ حابارلاۋىنشا، زاۋىت 100-120 مىڭ توننا شيكىزات قابىلداۋعا دايىن جانە 12 مىڭ توننا قانت وندىرۋگە دايىن. سونىمەن قاتار شارۋالارعا ءۇش كۇن ىشىندە تولەماقى تولەمەك.
