ساياحاتتاۋ ەشقاشان كەش ەمەس: 73 جاستاعى اقساقال الەم ەلدەرىن جاياۋ ارالاۋعا اتىراۋدان جولعا شىقتى

جاھان ەلدەرىنە جاياۋ اتتانعالى وتىرعان ساياحاتشى سارسەنباي قوتىراشوۆتىڭ ساپارى بۇگىن، 2 -تامىزدا باستالدى.
ول جاياۋ ساپارىنىڭ الدىندا اتىراۋلىق جاستارمەن كەزدەستى.
«مەنىڭ جاياۋ ساپارىم الەمنىڭ بىرنەشە ەلىن قامتيدى. قازاقستاننان جولعا شىعىپ، رەسەي، گرۋزيا، تۇركيا، بولگاريا، سەربيا، ۆەنگريا، اۆستريا، گەرمانيا، فرانسيا، ا ق ش، قىتاي، موڭعوليا ەلدەرىنە بارامىن. كەيىن رەسەي ارقىلى قازاقستانعا ورالۋدى كوزدەپ وتىرمىن. جاياۋ ساپارىم 2 جىلعا سوزىلىپ، 2025 -جىلدىڭ تامىزىندا اياقتايمىن دەگەن جوسپارىم بار»، - دەيدى سارسەنباي قوتىراشوۆ.
ول جاياۋ ساپارىن بىرنەشە باعىتقا بولگەن.
العاشقى مارشرۋتى - قازاقستان، رەسەي، گرۋزيا، تۇركيا ەلدەرىنە بارۋ. بۇل ەلدەردى ارالاۋ ءۇشىن 3 مىڭ شاقىرىمعا جۋىق جول جۇرەدى. بۇعان 100 كۇن قاجەت.
ەكىنشى باعىتتاعى تۇركيا، فرانسيا، ا ق ش ەلدەرىن 180 كۇندە ارالاۋدى جوسپارلاپ وتىر. بۇل ءۇشىن 9 مىڭ شاقىرىمنان استام جولدى ەڭسەرمەك.
ءۇشىنشى كەزەڭە ا ق ش- تان باستاپ، قىتاي، موڭعوليا، رەسەي ارقىلى قازاقستانعا ورالادى. بۇل كەزەڭدە 130 كۇندە 4 مىڭ شاقىرىمنان استام جول جۇرەدى.
«مەنىڭ ۇستانىمىم - ساياحاتتاۋ ەشقاشان كەش ەمەس. الەم ەلدەرىن جاياۋ ارالاعان قازاق قارياسىنىڭ اتىن گيننەستىڭ رەكوردتار كىتابىنا تىركەپ، الەمدىك رەكورد ورناتسام دەيمىن. ەڭ باستىسى، بەيبىتشىلىكتى ناسيحاتتاپ، جاھان ەلدەرىن ىنتىماققا شاقىرعىم كەلەدى. مەن بۇل ساپارعا ءتاستۇيىن دايىنمىن. بىلتىرعى ەلىمىزدىڭ وڭىرلەرىن جاياۋ ارالاعان ساپارىم مەن ءۇشىن ءارى سىناق، ءارى دايىندىق بولدى. جاسىمنىڭ ۇلعايعانىنا قاراماستان كەز كەلگەن قيىندىقتى جەڭۋگە بەكىنىپ وتىرمىن. ال، بۇل جولعى جاياۋ ساياحاتىم - وتە جاۋاپتى ساپار. سول سەبەپتەن، الەم ەلدەرىنە ساياحاتىمدى ءساتتى وتكىزۋ ءۇشىن كۇنىنە 30-40 شاقىرىمداي جاياۋ جۇرەمىن»، - دەدى سارسەنباي قوتىراشيەۆ.
وسىلايشا، الەمدى جاياۋ ارالاۋدى كوزدەگەن قازاق قارياسى ءۇش جىلدا 16210 شاقىرىم جول جۇرەدى.
جيھانكەزدىڭ دورباسىندا ەڭ قاجەتتى زاتتارى بار. بۇل - گيگيەنالىق زاتتار، كيىم، اياق كيىم مەن ازىق- تۇلىك.
ەسكە سالا كەتەلىك، بۇعان دەيىن 73 جاستاعى ۇلىتاۋلىق قاريا الەم بويىنشا جاياۋ مارافونعا اتتاناتىنى حابارلانعان ەدى.