قازاقتىڭ 73 جاستاعى قارياسى ەرتەڭنەن باستاپ جەر شارىن جاياۋ ارالاۋعا اتتانادى

Qazaq Geography ۇيىمى تاراتقا مالىمەتكە سەنسەك، 2- تامىزدا بەلگىلى قازاقستاندىق ساياحاتشى سارسەنباي قوتىراشوۆ دۇنيەجۇزى بويىنشا جاياۋ ساياحاتىن اتىراۋدان باستايدى.
اقساقال قازاقستان - رەسەي - گرۋزيا - تۇركيا - بولگاريا - سەربيا - ۆەنگريا - اۆستريا - گەرمانيا - فرانسيا – ا ق ش - قىتاي - موڭعوليا - رەسەي - قازاقستان باعىتى بويىنشا ساياحاتتاۋدى جوسپارلاپ وتىر.
ەسەپ بويىنشا، ساپار 2 جىلعا سوزىلادى، ول تۋردى 2025-جىلدىڭ تامىزىندا اياقتاۋدى كوزدەپ وتىر.
ىڭعايلى بولۋ ءۇشىن مارشرۋت بىرنەشە كەزەڭگە بولىنگەن.
ءبىرىنشى كەزەڭ: قازاقستان- رەسەي- گرۋزيا- تۇركيا. بۇل كەزەڭ جوسپار بويىنشا 3000 شاقىرىمداي جولدى ارتقا تاستاپ، 100 كۇندە وتەدى.
ەكىنشىسى: تۇركيا- فرانسيا- ا ق ش (180 كۇن جانە 9 مىڭنان استام ك م).
ءۇشىنشى: ا ق ش- قىتاي- موڭعوليا- رەسەي- قازاقستان (130 كۇن، جانە 4 مىڭنان استام ك م).
سارسەنباي قوتىراشوۆتىڭ ءوزى ايتقانداي، اينالىپ ءوتۋدىڭ باستى ماقساتى - گيننەستىڭ رەكوردتار كىتابىنا تىركەلىپ، الەمدىك رەكورد ورناتۋ.
كىتاپتاعى مالىمەتكە سايكەس، بۇگىنگى كۇنگە دەيىن دۇنيەنى 70 جاستان اسقان ادامنىڭ جاياۋ الەمدى شارلاعانى تۋرالى جازبا ءالى جازىلماعان.
«دەنساۋلىعىم وتە جاقسى. قازاقستان ىشىندەگى جاياۋ مارافون - مەن ءۇشىن تەكسەرۋ ءارى دايىندىق بولدى. مارافونعا ادامنىڭ جاسى كەدەرگى ەمەس. ماقساتىما جەتەتىنىمدى سەزەمىن، ءوز قابىلەتىمە سەنىمدىمىن، سوندىقتان وسىنداي جاۋاپتى قادامعا بارۋعا شەشىم قابىلدادىم»، - دەدى اقساقال كەزدەسۋدە.
سونىمەن قاتار تەك قاجەتتى گيگيەنالىق زاتتار، اۋىستىراتىن كيىم-كەشەك، اياق كيىم جانە ازىق-تۇلىكتىڭ از مولشەرىن سالاتىن اتاقتى ارباسىن وزىمەن بىرگە الىپ شىعاتىنىن دا ايتتى.
سارسەنباي قوتىراشوۆ كۇنىنە 30-40 شاقىرىمداي جاياۋ ءجۇرۋدى كوزدەپ وتىر.
«مۇنداي شىتىرمان وقيعاعا قارتايعاندا تەك جۇرەك قالاۋىمەن بارۋعا بولادى. ءسىز - سالاۋاتتى ءومىر سالتىن ناسيحاتتاۋدىڭ، كۇش-قۋات، تاباندىلىق پەن باتىلدىق كورىنىسىنىڭ تاماشا ۇلگىسىسىز. سىزگە مىقتى دەنساۋلىق، كۇش-قۋات، ماقساتىڭىزعا جەتۋىڭىزدى تىلەيمىز»، - دەيدى QazaqGeography باسقارما ءتوراعاسى ەرىك سۇلتانوۆ.
س. قوتىراشوۆقا باسقا ەلدەردە قازاقستان ەلشىلىكتەرى، سونداي-اق جەرگىلىكتى قازاق دياسپورالارى قولداۋ كورسەتپەك.
ساياحاتشىنىڭ وكىلى باقتيار قوجاحمەتوۆ جول بويى اقساقالمەن بايلانىستا بولادى جانە مونيتورينگ جۇرگىزەدى.
«قازاقستاننىڭ كونسۋلدىقتارى جانە ەلشىلىكتەرىمەن كەلىسسوز جۇرگىزدىك، ولار ءبىزدى قولداپ، وزدەرى ورنالاسقان ەلدەردىڭ سىرتقى ىستەرى مينيسترلىكتەرىنە ءتيىستى حابار بەردى. ياعني، شەكارادا ەش قيىندىق بولمايدى، سارسەنباي اعانىڭ ءتولقۇجاتى، ال قازاقستاندىقتارعا رەسەي، تۇركيا، گرۋزيا ەلدەرىنە بارۋعا ۆيزا كەرەك ەمەس»، - دەدى ول.
ءبىرىنشى كەزەڭ اياقتالعاننان كەيىن سارسەنباي قوتىراشوۆ قىستى كۇتىپ، كوكتەمنىڭ باستالۋىمەن توقتاعان جەرىنەن دۇنيەنى اينالىپ شىعۋ ءۇشىن قازاقستانعا ورالادى.
وسى ۋاقىت ىشىندە ونىڭ وكىلدەرى كەلەسى قادام ءۇشىن سۇيەمەلدەۋدى قوسۋ ءۇشىن وسى ءورشىل جوبانى قارجىلاندىرۋدى قامتاماسىز ەتە الاتىن دەمەۋشىلەردى تابۋعا ۇمىتتەنەدى.
ەسكە سالايىق، سارسەنباي قوتىراشوۆ بىلتىر 72 جاسىندا قازاقستاننىڭ 17 وبلىسىن (8 مىڭ ك م) 6 ايدا جاياۋ ءجۇرىپ وتكەن بولاتىن.