توتەنشە جاعدايلار مينيسترلىگىندە جەمقورلىقتىڭ 70 پايىزىن بولىمشە باسشىلارى جاساعان
توتەنشە جاعدايلار مينيسترلىگى بولىمشەلەرىنىڭ ءاربىر ەكىنشى باسشىسى سىبايلاس جەمقورلىق جاسايدى، دەپ حابارلايدى قازاقپارات انتيكورعا سىلتەمە جاساپ.
بۇل تۋرالى بۇگىن توتەنشە جاعدايلار مينيسترلىگىنىڭ باسشىلىعىمەن وتكەن كەڭەس بارىسىندا سىبايلاس جەمقورلىققا قارسى قىزمەت ءتوراعاسى اسحات جۇماعالي مالىمدەدى.
سوڭعى 5 جىلدا ازاماتتىق قورعاۋ ورگاندارىندا 150 گە جۋىق سىبايلاس جەمقورلىق فاكتىلەرى تىركەلگەن.
سىبايلاس جەمقورلىق قىلمىستارى ەلىمىزدىڭ بارلىق وڭىرىندە ورىن العان.
ولاردىڭ باسىم بولىگى الماتى، استانا، شىمكەنت قالالارىنا، سونداي-اق قوستاناي جانە الماتى وبلىستارىنا تيەسىلى.
انىقتالعان قىلمىستاردىڭ ىشىندە پاراقورلىق پەن جىمقىرۋ فاكتىلەرى باسىم. «زاڭسىز سىياقى» ءورت قاۋىپسىزدىگىن قامتاماسىز ەتۋ بويىنشا تەكسەرۋ اكتىسىنە قول قويۋ كەزىندە، وقۋدان وتكىزۋ، رۇقسات بەرۋ جانە جۇمىسقا ورنالاسۋ ءۇشىن بەرىلىپ وتىرعان.
اگەنتتىك ءتوراعاسى اتاپ وتكەندەي، جۇرگىزىلىپ جاتقان سىبايلاس جەمقورلىققا قارسى جۇمىستارعا قاراماستان، ت ج م قىزمەتكەرلەرى پارا الۋدان تىيىلار ەمەس.
«كۇنى كەشە جەتىسۋ وبلىسىندا جەرگىلىكتى ت ج ءبولىم باسشىسى جۇمىسقا العان ادامنان اقشا العانى انىقتالدى. بۇگىنگى ءىس-شارانىڭ وتەتىنىن بىلە تۇرا، سوندا دا قىلمىسقا بارىپ وتىر. بۇل ورايدا پروفيلاكتيكالىق تۇرعىدا ناقتى ارەكەت ەتۋ قاجەت. قىزمەتكەرلەردىڭ مىنەز-قۇلقىن تۇزەتىپ، پسيحولوگيالىق كوزقاراسىن وزگەرتۋ ماڭىزدى».
بۇعان دەيىن سىبايلاس جەمقورلىققا قارسى قىزمەتپەن ت ج م ورتكە قارسى قىزمەت كوميتەتىنىڭ ءتوراعاسى، شىمكەنت قالاسىنىڭ جانە جەتىسۋ وبلىسىنىڭ دەپارتامەنت باسشىلارى ۇستالعان بولاتىن.
ولار ورتكە قارسى قاۋىپسىزدىك سالاسىنداعى قامقورلىعى ءۇشىن كاسىپكەرلەردەن جۇيەلى تۇردە پارا الىپ وتىردى، تەكسەرىلەتىن ۇيىمداردى كەلىسىمشارت جاساسۋ جولىمەن قىزمەتتەردى ساتىپ الۋعا ماجبۇرلەپ، ولار بويىنشا ۋاقىتىلى اقى تولەۋىن قامتاماسىز ەتتى دەپ كۇدىكتەنەدى.
باسشىلىق قۇرامنىڭ قاتىسۋىمەن بولعان سىبايلاس جەمقورلىق فاكتىلەرى الماتى قالاسىندا، شىعىس قازاقستان، قىزىلوردا جانە سولتۇستىك قازاقستان وبلىستارىندا دا ورىن العان.
ءوز كەزەگىندە، توتەنشە جاعدايلار ءمينيسترى جوعارىدا اتالعان فاكتىلەردى مويىنداپ، ۆەدومستۆو سىبايلاس جەمقورلىققا قارسى كۇرەستى كۇشەيتۋ ءۇشىن تۇبەگەيلى قادامدار جاسايتىنىن مالىمدەدى.
«بۇل ءبىزدىڭ قىزمەتكەرلەر ءۇشىن جاعا ۇستاتارلىق جاعداي. اتالعان ادامدار بەلگىلى ءبىر جەتىستىكتەرگە قول جەتكىزگەن ۇزدىك قىزمەتكەرلەردىڭ قاتارىنان بولاتىن. دەگەنمەن وسى جاعدايدا ولاردىڭ ءبىز بىلمەگەن تەرىس قاسيەتى - ەكىجۇزدىلىگى اشكەرەلەندى. ايتىلىپ وتكەن دەرەكتەرگە قاتاڭ سىنمەن قارايمىز. بۇدان ءبىز ءتيىستى ساباق الامىز، قاراپايىم ءورت سوندىرۋشىلەر بىزگە سەنىممەن قاراۋى كەرەك»، - دەدى س. ءشارىپحانوۆ.
ت ج مينيسترلىگىنە جەكە قۇرام اراسىندا جۇرگىزىلەتىن الدىن الۋ جۇمىستارىن كۇشەيتۋ ۇسىنىلدى.
«سىبايلاس جەمقورلىق تاۋەكەلدەرىنە ىشكى تالداۋ جۇرگىزىپ، پروبلەمالىق ۋچاسكەلەردى زەردەلەۋ، سونداي-اق ۆەدومستۆونىڭ بارلىق قىزمەتكەرلەرىن ادالدىق تۇرعىسىندا تەكسەرۋدى اپروباتسيالاۋ قاجەت»، - دەدى ا. جۇماعالي.
