رەسەيدەن باستالعان ورمان ءورتى اباي وبلىسىندا 70 گەكتار اۋماققا جايىلدى

سەمەي. قازاقپارات - اباي وبلىسىندا ورمان ءورتىن سوندىرۋگە بۇكىل كۇش-قۇرالدار جۇمىلدىرىلدى. وقيعا ورنىندا بارلىق قىزمەتتەر، سونداي-اق وبلىس اكىمىنىڭ ورىنباسارى ديميتري گاريكوۆ ءجۇر، دەپ حابارلايدى قازاقپارات.

ءوڭىر اكىمدىگىنىڭ مالىمەتىنشە، ايماق باسشىسى جاعدايدى باقىلاۋدا ۇستاپ وتىر. قازىرگى ۋاقىتتا ەلدى مەكەندەرگە قاۋىپ ءتونىپ تۇرعان جوق.

دەگەنمەن، جەرگىلىكتى ورگاندار حالىقتى ەۆاكۋاتسيالاۋعا دايىن. جالىنمەن كۇرەس بويىنشا قاجەتتى ءىس-قيمىل توتەنشە جاعداي دەپارتامەنتىمەن بىرگە پىسىقتالادى.

ايتا كەتەيىك، 22-مامىر ساعات 15:25-تە رەسەيدىڭ التاي ولكەسىندە نوۆەنكوە اۋىلىنىڭ ماڭىندا قۇرعاق ءشوپ جانىپ، دالا ءورتى تۇتانعان.

بۇل جەر اباي وبلىسى بورودۋليحا اۋدانى اۋىل ەلدىمەكەنىنەن 7 شاقىرىم قاشىقتىقتا. كەيىن ءتىلسىز جاۋ «سەمەي ورمانى» تابيعي رەزەرۆاتىنا، ياعني قازاقستان اۋماعىنا قاراي ءوتتى.

ورمان شارۋاشىلىعىنىڭ مالىمەتىنشە، ساعات 22:50 دە ءورتتىڭ الدىن الا اۋدانى 70 گەكتارعا جەتكەن.

ءورتتى سوندىرۋگە ت ج د جەكە قۇرامىنان 40 ادام جانە 10 تەحنيكا، ورمان شارۋاشىلىعىنان 108 ادام جانە 38 تەحنيكا تارتىلعان.

سەمەي قالاسىنان قوسىمشا ءورت ءسوندىرۋ تەحنيكاسى وقيعا ورنىنا اتتاندى.

اۋىلعا كىرەبەرىستە جەدەل وبلىستىق شتاب قۇرىلدى.

ايتا كەتەيىك، ساعات 23:07-دە سەمەي قالاسىنان اۋىل ەلدىمەكەنىنە ق ت ج ءورت ءسوندىرۋ پويىزى كەلدى.