الماتىداعى ستۋدەنتتەردىڭ 70 پايىزى - وڭىرلەردەن كەلۋشىلەر

الماتى. قازاقپارات - وتكەن جىلى الماتىدا 255 مىڭنان استام جاس ءبىلىم الدى. بيىلعى وقۋ جىلىندا ستۋدەنتتەر سانى ودان دا كوپ بولادى دەگەن بولجام بار، دەپ حابارلايدى قازاقپارات ءتىلشىسى.

الماتىدا بۇگىندە 36 جوعارى وقۋ ورنى مەن 94 كوللەدج بار.

«وتكەن جىلى 36 ج و و- دا 182 مىڭ ستۋدەنت وقىدى، سونداي- اق وتكەن وقۋ جىلىنىڭ مالىمەتى بويىنشا قالادا 255 مىڭنان استام جاس ءبىلىم الىپ شىققان. بيىلعى وقۋ جىلى ستۋدەنتتەر سانى ودان دا كوپ بولادى دەپ كۇتىپ وتىرمىز»، - دەدى قالالىق جاستار ساياساتى باسقارماسىنىڭ باسشىسى قايىرجان مەڭدىعاليەۆ.

ول سونداي-اق، جىل سايىن الماتىدا ورنالاسقان جوعارى وقۋ ورىندارىندا ءبىلىم الاتىن ستۋدەنتتەردىڭ شامامەن %70 ى وڭىرلەردەن كەلەتىن ستۋدەنتتەر ەكەنىن جانە 36 ج و و- دا ءبىر ۋاقىتتا 30 مىڭنان استام ستۋدەنت تۇراتىن 95 جاتاقحانا ورنالاسقانىن مالىمدەدى.

«الماتى - جاستار قالاسى. مۇندا 14 پەن 20 جاس اراسىنداعى جاستاردىڭ سانى 440 مىڭنان اسادى. بۇدان بولەك، قالامىزدا ەڭ كوپ جوعارى وقۋ ورىندار مەن كوللەدجدەر ورنالاسقان»، - دەدى سپيكەر.

ايتا كەتسەك، الماتىدا بيىلعى جىلدىڭ 1-ماۋسىمىنان باستاپ قالالىق جاستار ساياساتى باسقارماسى قۇرىلدى. ونىڭ باستى مىندەتى - قالا جاستارىنىڭ مۇددەلەرى مەن قۇقىقتارىن قورعاۋ.