ءبىرىنشى سىنىپقا باراتىن بالالاردىڭ 70 پايىزدان استامى قازاق تىلىندە وقۋدى تاڭداعان
ونىڭ ىشىندە بالالاردىڭ %70,5 مەملەكەتتىك تىلدە وقۋدى تاڭداعان، دەپ حابارلايدى قازاقپارات ءبىلىم جانە عىلىم مينيسترلىگىنە سىلتەمە جاساپ.
ءبىرىنشى سىنىپقا وتىنىشتەردى قابىلداۋ 2022-جىلعى 1- ساۋىردە باستالىپ، 1- تامىزعا دەيىن جالعاسادى.
ازاماتتارعا ىڭعايلى بولۋ ءۇشىن قىزمەت اۆتوماتتاندىرىلدى.
قۇجاتتاردى قابىلداۋ egov.kz پورتالى ارقىلى جۇرگىزىلىپ جاتىر. سونداي-اق اتا-انالاردىڭ ءوتىنىشى بويىنشا قۇجاتتاردى ءداستۇرلى قاعاز فورماتىندا دا تاپسىرۋعا بولادى.
«قۇجاتتاردى قابىلداۋ شتاتتىق رەجيمدە ءجۇرىپ جاتىر. وسى رەتتە قۇجاتتاردى تاپسىرۋدا اتا-انالاردىڭ بەلسەندىلىگىن بايقاۋعا بولادى. بيىل مەملەكەتتىك تىلدە ءبىلىم العىسى كەلەتىن 1-سىنىپ بالالارى كوبەيدى. قازاق تىلىندە وقيتىن سىنىپتارعا قابىلداۋدىڭ ەڭ جوعارى كورسەتكىشى ماڭعىستاۋ (%91)، قىزىلوردا (%91,5)، جامبىل (%82,2) جانە اتىراۋ (%80,1) وبلىستارىندا تىركەلدى»، - دەدى مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كارىموۆا.
جاڭا وقۋ جىلىندا 1-سىنىپقا بارلىعى 400 مىڭنان استام قازاقستاندىق بالا بارادى دەپ كۇتىلىپ وتىر.
