زاڭسىز اينالىمداعى 70 مىڭ ءدارى مەن جارتى ميلليون ماسكا تاركىلەندى

نۇر- سۇلتان. قازاقپارات – ق ر ىشكى ىستەر ۆيتسە- ءمينيسترى الەكسەي كالايچيدي زاڭسىز اينالىمداعى دارىلىك زاتتاردى انىقتاۋ جۇمىستارى تۋرالى ايتىپ بەردى، دەپ حابارلايدى قازاقپارات.

«مەملەكەت باسشىسىنىڭ دارىلىك زاتتاردى زاڭسىز ساۋدالاۋعا قاتىستى تاپسىرماسى ورىندالىپ جاتىر. 5- شىلدەدەن بەرى مۇنداي 537 زاڭ بۇزۋشىلىق انىقتالدى، ونىڭ 58 ى بويىنشا ق ر قىلمىستىق كودەكسىنىڭ 214- بابى بويىنشا سوتقا دەيىنگى تەرگەۋ باستالعان. قالعاندارى اكىمشىلىك وندىرىسكە جىبەرىلدى. پوليتسياعا 431 ادام جەتكىزىلدى» ، - دەدى سپيكەر ورتالىق كوممۋنيكاتسيالار قىزمەتىندە وتكەن ونلاين بريفينگتە. سپيكەردىڭ ايتۋىنشا، زاڭسىز اينالىمنان 70,8 مىڭ قاپتاما مەديتسينالىق پرەپاراتتار، جارتى ميلليونعا جۋىق مەديتسينالىق ماسكا، 36 مىڭ دانا قولعاپ پەن وزگە دە بۇيىمدار (قىزۋ ولشەگىش، كوزدى قورعاۋ قۇرالى) جانە 705 ليتر انتيسەپتيك الىنعان. «الىنعان ونىمدەردىڭ باسىم كوپشىلىگى شىمكەنت (19,5 مىڭ دانا بۇيىم) ، الماتى (14,5 مىڭ دانا) ، نۇر- سۇلتان (5 مىڭ دانا) ، اتىراۋ (11,8 مىڭ دانا) جانە جامبىل (4,2 مىڭ دانا) وبلىستارىنا تيەسىلى. قۇقىق بۇزۋشىلىق تۋرالى بارلىق ماتەريالدار ەكونوميكالىق تەرگەۋلەر قىزمەتىنە جانە دەنساۋلىق ساقتاۋ ورگاندارىنا جىبەرىلدى» ، - دەدى ۆيتسە- مينيستر. زاڭسىز اينالىمنان الىنعان مەديتسينالىق پرەپاراتتار مەن بۇيىمدار دەنساۋلىق ساقتاۋ ورگاندارىنا ناۋقاستاردى ەمدەۋگە جىبەرىلەدى.