سۋعا كەتكەندەردىڭ 70 پايىزى جۇزە بىلەتىن - ق ر توتەنشە جاعدايلار كوميتەتىنىڭ ءتوراعاسى

نۇر-سۇلتان. قازاقپارات – ق ر ءى ءى م توتەنشە جاعدايلار كوميتەتىنىڭ ءتوراعاسى ۆلاديمير بەككەر ادامداردىڭ سۋعا كەتۋ ستاتيستيكاسىنا قاتىستى ءوز زەرتتەۋىمەن ءبولىستى، دەپ حابارلايدى قازاقپارات ءتىلشىسى.

«سۋدا اجال قۇشقان بارلىق ادامدارعا قاتىستى ستاتيستيكانى جۇرگىزۋدى باستادىق. وسى ورايدا تالداۋ جاساپ، بۇل قايعىلى وقيعالاردىڭ سەبەبىن انىقتاۋ كەرەك بولدى. بۇل تۇرعىدا «سۋعا باتقان ادامداردىڭ قانشاسى جۇزە الادى؟» دەگەن ساۋال بويىنشا تالداۋ جاسالدى. ناتيجەسىندە سۋدان اجال قۇشقان ادامداردىڭ جالپى سانىنان 70 پايىزى جۇزە بىلەتىنى انىقتالدى. وسى جاعدايدا ادامدار وزدەرىنىڭ شاماسىن دۇرىس باعالامايتىنى وكىنىشتى»، - دەدى ۆ. بەككەر باسپا ءسوز ءماسليحاتىندا.

ونىڭ پايىمىنشا، تابيعاتقا دەمالۋ ءۇشىن بارعاندار كوبىنە سۋ مەن وتتان بولاتىن قاتەردى جەتە تۇسىنبەيدى.

«سۋدان قورىققاننىڭ ەش ۇياتى جوق، ويتكەنى تەرەڭ كولدەر مەن سۋ قويمالارىندا ناقتى قاتەر بار. ءوز شاماسىن دۇرىس باعالامايتىندار وسىدان زارداپ شەگىپ جاتادى»، - دەدى ت ج ك باسشىسى.

بۇدان بۇرىن حابارلانعانداي، شومىلۋ ماۋسىمى باستالعالى بەرى 214 ادام سۋعا باتتى، سونىڭ 75 ى بالالار. بۇل تۇرعىدا 198 ادام شومىلۋعا ارنالماعان جەردە اجال قۇشقان.

اۆتور: رۋسلان عابباسوۆ