قوستانايلىق زاۋىت ءسۇت ونىمدەرىنىڭ 70 ءتۇرىن شىعارادى
دەپۋتاتتار قالاداعى «ميلح» ءسۇت شىعارۋ زاۋىتىندا بولدى. ولار مۇندا اگرارلىق سالاعا قاتىستى زاڭ نورمالارىنىڭ جەرگىلىكتى جەردە قالاي جۇزەگە اسىپ جاتقانىمەن تانىستى. «ميلح» ج ش س ءسۇت ونىمدەرىنىڭ 70-كە جۋىق ءتۇرىن شىعارادى. مۇندا بۇگىندە 600-گە جۋىق ادام ەڭبەك ەتەدى. ءوندىرىس بارىسى سوڭعى ۇلگىدەگى «اقىلدى» ماشينامەن باسقارىلادى. كاسىپورىن بەس جىل بويى تاۋارىن رەسەيگە ەكسپورتتاپ كەلەدى. بىلتىر سىرتقى نارىققا جىبەرىلگەن ءونىمنىڭ ۇلەسى 12 پروتسەنتكە ارتقان. زاۋىت شيكىزاتتى جەرگىلىكتى وندىرۋشىلەردەن ساتىپ الادى. بۇل ءسۇت وندىرەتىن شارۋاشىلىقتار مەن اۋىل تۇرعىندارى ءۇشىن اسا ءتيىمدى.
«جىل سايىن اۋىلشارۋاشىلىعى سالاسىنا 600 ميلليارد تەڭگە بولىنەدى. سونىڭ تەڭ جارتىسى - سۋبسيديا. بۇل دەگەنىڭىز، قايتارىمسىز قارجى. مەملەكەت تاراپىنان كاسىپ باستاۋشىلارعا ۇلكەن كومەك كورسەتىلىپ جاتقانىن بايقاۋعا بولادى. مۇنىڭ ءبارى بيزنەستى، سونىڭ ىشىندە اۋىلدىق جەردەگى ءوندىرىستى دامىتۋ ءۇشىن جاسالىپ جاتقان جۇمىس»، - دەيدى ق ر پارلامەنتى ءماجىلىسىنىڭ دەپۋتاتى مۇرات تەمىرجانوۆ.
حالىق قالاۋلىلارى اۋماقتىق كاسىپوداق اياسىندا جۇمىس ىستەيتىن جاستاردىڭ كەڭەيتىلگەن وتىرىسىنا قاتىستى. جاس كاسىپكەر ايگۇل مۇستافينانىڭ سوزىنشە، قازىرگى ۋاقىتتا جاستاردىڭ باستامالارىنا زاماناۋي ۇلگىدە قولداۋ كورسەتىلەدى.
«مەن بىلتىر «جاس پروەكت» جوباسىنا قاتىسىپ، «كىشكەنتاي» اتتى الەۋمەتتىك تىگىنحانا اشتىم. باستاپقىدا ءۇش باعىتتا جۇمىس ىستەدىك. سونىڭ ءبىرى - ەرەكشە كۇتىمدى تالاپ ەتەتىن بالعىندارعا ساۋىقتىرۋ ونىمدەرىن شىعارا باستادىق. شالا تۋعان نارەستەلەرگە ارنايى توقىلعان كيىمدەردى تىگۋ دە جوسپارعا ەندى. بۇل باستاماعا ەلباسى نۇرسۇلتان نازاربايەۆتىڭ ءوزى ەرەكشە لەبىزىن ءبىلدىردى»، - دەيدى جاس كاسىپكەر.
كەزدەسۋدە الەۋمەتتىك سالالار بويىنشا ماسەلەلەر كوتەرىلدى. وسى ۋاقىتقا دەيىن وبلىستا 20 مىڭنان استام ادام الەۋمەتتىك كومەككە قول جەتكىزگەن. ورتا ەسەپپەن ايماقتا ايىنا ءبىر بالاعا كومەك مولشەرى 4706 تەڭگەدەن باستاپ 20789 تەڭگەگە دەيىن جەتەدى. بۇل وتكەن جىلعىدان 4,4 ەسەگە دەيىن ۇلعايدى.
وبلىستا «قۇتتى مەكەن» جوباسى اياسىندا 2 ميللياردتان استام قارجىعا 46 جوبانى جۇزەگە اسىرۋ كوزدەلۋدە. حالىق قالاۋلىلارى الەۋمەتتىڭ الەۋەتىن الدەندىرەتىن باستامالار الداعى ۋاقىتتا دا جالعاساتىنىن جەتكىزدى.
اۆتور: قاسقىرباي قويشىمانوۆ