مەشىتتەگى ازاننىڭ دىبىسى 70 دەتسيبەلدەن اسپاۋى ءتيىس - ءدىن ىستەرى مينيسترلىگى
سوڭعى ۋاقىتتا قازاقستان رەسپۋبليكاسىنىڭ ءدىن ىستەرى جانە ازاماتتىق قوعام مينيسترلىگىنە مەشىتتەردەگى ازاننىڭ دىبىس دەڭگەيىن رەتتەۋگە قاتىستى كوپتەگەن وتىنىشتەر كەلىپ تۇسكەن.
«وسى تۇرعىدا ءدىن ىستەرى كوميتەتى قازاقستان مۇسىلماندارى ءدىني باسقارماسىمەن جانە وبلىستاردىڭ، استانا مەن الماتى قالالارى ءدىن ىستەرى جونىندەگى باسقارمالارمەن بىرلەسىپ، مەشىتتەردەگى ازاننىڭ دىبىس دەڭگەيىن تۇرعىن ءۇي جانە باسقا ءۇي- جايلاردى، قوعامدىق عيماراتتاردى ۇستاۋعا جانە پايدالانۋعا ارنالعان سانيتارلىق- ەپيدەميولوگيالىق تالاپتارعا سايكەستەندىرۋ ماقساتىندا ءتۇسىندىرۋ جۇمىستارىن جۇرگىزۋدە»، دەلىنگەن حابارلامادا.
اتالعان تالاپتارعا سايكەس، پاتەرلەردىڭ بولمەلەرىنە شۋدىڭ ەنۋ نورمالارى ساعات تاڭعى 7.00 دەن تۇنگى 23.00-گە دەيىن 55-تەن 70 د ب ا (دەتسيبەل)، ال، ساعات 23.00 دەن 7.00-گە دەيىن 45-تەن 60 د ب ا (دەتسيبەل) بولۋى قاجەت.
قازاقستان مۇسىلماندارى ءدىني باسقارماسى ءدىن ىستەرى جانە ازاماتتىق قوعام مينيسترلىگىنىڭ ۇسىنىمدارىن جانە ازاننىڭ دىبىس ىرعاعىن اسىرماۋعا قاتىستى سانيتارلىق- ەپيدەميولوگيالىق تالاپتاردى ۇستانادى.
«جوعارىدا ايتىلعاندارعا بايلانىستى مەشىتتەردىڭ باسشىلىعىن سانيتارلىق- ەپيدەميولوگيالىق تالاپتاردىڭ نورمالارىن ساقتاۋعا جانە تۇرعىنداردى ەگەر ولاردىڭ ارەكەتى قولدانىستاعى زاڭناماعا قايشى كەلمەسە، ءدىني راسىمدەرگە تۇسىنىستىكپەن قاراۋعا شاقىرامىز»، - دەلىنگەن حابارلامادا.
