س ق و اكىمى: دۇكەندەردەگى تاۋارلاردىڭ 70 پايىزى قازاقستاندىق بولۋى ءتيىس - فوتو

پەتروپاۆل. قازاقپارات - سولتۇستىك قازاقستان وبلىسىندا اكىمدەردىڭ ەسەپ بەرۋى جالعاسىپ جاتىر. وسى جول تۇرعىنداردىڭ الدىندا ماعجان جۇمابايەۆ اۋدانىنىڭ اكىمى ەسەپ بەردى. كەزدەسۋگە ايماق باسشىسى ەرىك سۇلتانوۆ قاتىستى.

اۋدانعا ساپارى بارىسىندا اكىم «نيزكوتسەن» سۋپەرماركەتىنە باس سۇقتى.

ماعجان جۇمابايەۆ اۋدانى رەسەيلىك ينۆەستورلاردىڭ قاتىسۋىمەن «نيزكوتسەن» دۇكەنى اشىلعان العاشقى اۋدان بولدى. ول وتكەن جىلدىڭ جەلتوقسان ايىندا اشىلعان بولاتىن. ەرىك سۇلتانوۆ دۇكەن سورەلەرىنە قويىلعان ونىمدەرمەن تانىسىپ شىقتى. سورەلەردە قازاقستان مەن رەسەي تاۋارلارى. بارلىعى 8 مىڭ اتالىم بولدى.

 ءدال وسى كۇنى اۋدان اكىمى اسقار بەگمانوۆ حالىق الدىندا ەسەپ بەردى. ەسەپ بەرۋ باستالعانعا دەيىن مادەنيەت ۇيىندە وتاندىق تاۋار وندىرۋشىلەر ءوز ونىمدەرىمەن تانىستىردى. ەرىك سۇلتانوۆ «نيزكوتسەن» دۇكەنىمەن بايلانىستى نىعايتۋ قاجەتتىگىن اتاپ ءوتتى.

 «دۇكەندى قازاقستاندىق ونىمدەرمەن تولتىرىپ قويۋ كەرەك. ءبىز سورەلەردەگى تاۋارلاردىڭ 70 پايىزى وتاندىق ءونىم بولادى دەپ كەلىستىك»، - دەدى ەرىك سۇلتانوۆ.

 كەزدەسۋ بارىسىندا تۇرعىندار سۋمەن جابدىقتاۋ، جول سالۋ سياقتى تاعى باسقا دا ماسەلەلەردى كوتەردى.

 سونىمەن بىرگە اۋداندا «جۇمىسپەن قامتۋ-2020» م ب ويداعىداي جۇزەگە اسىرىلىپ كەلە جاتقانى اتاپ ءوتىلدى. وتكەن جىلى وڭتۇستىك وڭىردەن ەكى وتباسى كوشىپ كەلگەن بولاتىن. سولاردىڭ ءبىرى ايتبايەۆتار وتباسىنا باسپانا بەرىلىپ، جۇمىسپەن قامتىلدى.

 وتكەن جىلى بايتەرەك اۋىلىنا و ق و- دان 11 ادام كوشىپ كەلگەن بولاتىن. ولاردىڭ بارلىعى دا «نۇرسەن اگرو» شارۋاشىلىعىندا جۇمىس جاسايدى.
 

×  

×