استانالىقتار ۇلى جەڭىستىڭ 70 جىلدىعىن اتاپ ءوتتى - فوتو
ءداستۇر بويىنشا استاناعا جەڭىس كۇنىن تويلاۋعا بارلىق ايماقتاردان ارداگەرلەر شاقىرىلدى. جەڭىس مەرەكەسىنە 500 گە جۋىق ۇ و س ارداگەرى، تىل ەڭبەككەرلەرى، سونىمەن قاتار، ەلوردا تۇرعىندارى مەن قوناقتارى جينالدى.
مەرەكەلىك شارا اياسىندا ارداگەرلەر ءۇشىن سوعىس جىلدارىنداعى اندەر شىرقالىپ، ەلوردانىڭ شىعارماشىلىق ۇجىمدارى ءوز ونەرلەرىن ورتاعا سالدى. سونىمەن قاتار، الاڭدا شاتىرلار تىگىلىپ، مايدانگەرلەردىڭ قۇرمەتىنە مەرەكەلىك داستارحان جايىلدى.
ۇلى وتان سوعىسىنىڭ ارداگەرى، پاۆلودار وڭىرىنەن كەلگەن ەگور پوۆلياگين 1943 - جىلى موڭعول حالىق رەسپۋبليكاسىنا اسكەر قاتارىنا شاقىرىلعان بولاتىن. اسكەر كەڭەس وداعىنىڭ شىعىس شەكاراسىن كۇزەتتى.
- 1945 - جىلى گەرمانيانى جەڭگەننەن كەيىن مەن ۇلى جەڭىستى موڭعول جەرىندە قارسى الدىم. بۇل ءبىز ءۇشىن ۇلى قۋانىش ەدى، اسكەريلەردىڭ سول كەزدەگى قۋانىشىن سوزبەن جەتكىزۋ مۇمكىن ەمەس، - دەپ ەسكە الادى ە. پوۆلياگين.
ارداگەرلەر بارشا قازاقستاندىقتارعا بەرەكە مەن بىرلىك، اشىق اسپان مەن بەيبىت ءومىر تىلەدى.
بۇگىن ۇلى جەڭىستىڭ 70 جىلدىعىنىڭ قۇرمەتىنە ەلوردالىقتار ءۇشىن حالىقتىق سەرۋەندەر مەن كونسەرتتىك باعدارلامالار ۇيىمداستىرىلۋدا.
- قۇرمەتتى ارداگەرلەر، بۇگىن، 9 - مامىر - جەڭىستىڭ 70 جىلدىعىن تويلاپ جاتىرمىز. شىن جۇرەكتەن ارداگەرلەرگە تىلەيتىنىم دەندەرى ساۋ بولسىن، ومىرلەرى ۇزاق بولسىن، اسپانىمىز اشىق بولسىن. تەك قانا جاقسىلىق بولسىن، - دەدى استانا قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ءلاززات ابۋيەۆا.
ايتا كەتەيىك، قازىرگى ۋاقىتتا استانا قالاسىندا 206 ۇ و س ارداگەرى تۇرادى.
