ۇلى جەڭىسكە 70 جىل: اقمولا جەرىنەن تۇلەپ ۇشقان باتىر

كوكشەتاۋ. قازاقپارات - ۆاسيلي ميتروفانوۆيچ بەنبەرين 1918-جىلى 9- مامىردا اقمولا وبلىسىنىڭ ساندىقتاۋ اۋدانىنداعى بوگوسلوۆكا سەلوسىندا دۇنيەگە كەلدى. ورتا مەكتەپتى جانە فابريكا-زاۋىت ۋچيليشەسىن بىتىرگەننەن كەيىن كوكشەتاۋ «استىق دايىنداۋ» پۋنكتىندە جۇرگىزۋشى بولىپ ەڭبەك ەتتى.

1938-جىلى جۇمىسشى-شارۋالاردىڭ قىزىل ارمياسىنا اسكەرگە الىندى. قىزىل ارميانىڭ پولشا جورىعىنا جانە فين سوعىسىنا قاتىستى. ال، 1944-جىلى ورلوۆ تانكى ۋچيليشەسىن ءتامامداعاننان كەيىن مايدانعا اتتاندى. ول 1- بەلارۋس مايدانىنىڭ قۇرامىندا پولشانى ازات ەتۋ ۇرىستارىنا قاتىسىپ، ەرلىك كورسەتتى.

العى شەپتەگى ۇرىستاردىڭ بىرىندە گۆارديا كىشى لەيتەنانتى ۆاسيلي بەنبەريننىڭ تانكىسى پيليتسا وزەنىن كەشىپ ءوتىپ، جاۋدىڭ قالىڭ ءنوپىرىن جەرمەن جەكسەن ەتتى. ءسويتىپ، ول وزەننىڭ ارعى بەتىنە العاشقىلاردىڭ ءبىرى بولىپ شىعىپ، جاۋ پلاتسدارمىن باسىپ الدى. وسىلايشا كەڭەس اسكەرىنىڭ نەگىزگى كۇشى كەلگەنشە جاۋعا باس كوتەرتپەدى.

لوۆەچ قالاسى ءۇشىن بولعان ۇرىستا اعا لەيتەنانت ك. نيكونوۆتىڭ ۆزۆودى قۇرامىندا ونىڭ ەكيپاجى بزۋرا وزەنى ارقىلى قالاعا باسىپ كىردى.

ۆ. بەنبەريننىڭ ەكيپاجى ارنايى بۇيرىق الىپ، تەمىرجول ستانساسىن باسىپ الدى. وسى جانقيارلىق ەرلىگى ءۇشىن وعان ك س ر و جوعارعى كەڭەسى پرەزيديۋمىنىڭ جارلىعىمەن 1945-جىلدىڭ 27- اقپانىندا كەڭەس وداعىنىڭ باتىرى اتاعى بەرىلدى.

ۆاسيلي بەنبەرين مايداننان ورالعان سوڭ كوكشەتاۋ وبلىستىق پارتيا كوميتەتىنىڭ نۇسقاۋشىسى، الماتى قالاسى وكتيابر اۋداندىق پارتيا كوميتەتىنىڭ ونەركاسىپ جانە كولىك ءبولىمىنىڭ مەڭگەرۋشىسى قىزمەتتەرىن اتقاردى.

1975-جىلى زەينەتكەرلىككە شىقتى. ۇلى جەڭىستى جاقىنداتقان باتىرلاردىڭ ءبىرى - ۆ. بەنبەرين 2005-جىلدىڭ 24- قاڭتارىندا الماتى قالاسىندا 87 جاسقا قاراعان شاعىندا دۇنيەدەن ءوتتى.

اۆتور: اسلان وسپانوۆ