اقىن جاركەن بودەش ۇلىنىڭ 70 جىلدىعى ءوتتى - فوتو
ادەبي- مادەني كەش اقىننىڭ 70 جاسقا تولۋىنا وراي قازاقستان جازۋشىلار وداعىنىڭ جانە جەكەلەگەن ازاماتتاردىڭ قولداۋىمەن ءوتىپ وتىر.
كەش شىمىلدىعىن قازاقستان جازۋشىلار وداعى باسقارماسى ءتوراعاسىنىڭ ءبىرىنشى ورىنباسارى، اقىن عالىم جايلىباي اشتى. ع. جايلىباي قازاقستان رەسپۋبليكاسىنىڭ مادەنيەت ءمينيسترى ارىستانبەك مۇحامەدي ۇلى ۇلىنىڭ قۇتتىقتاۋ حاتىن وقىپ، اقىننىڭ يىعىنا شاپان جاپتى. كەش تىزگىنىن «ايقىن» گازەتىنىڭ باس رەداكتورى نۇرتورە ءجۇسىپ ۇستادى.
ج. بودەش ۇلى تۋرالى «وتانشىل رۋحتىڭ اقىنى» دەگەن تاقىرىپپەن كولەمدى بايانداما جاساعان اقىن نەسىپبەك ايت ۇلى: «جاركەن جىراۋدى مەن وسىدان قىرىق جىل بۇرىن ءسالىمعازى ابەيەۆ دەگەن اقىننان ەستىدىم»، - دەپ باستاپ، بودەش ۇلىنىڭ ءومىرى، ولەڭگە كەلۋى، پوەزياسى جايلى مول ماعۇلمات بەردى.
جاركەن بودەش ۇلى كوپ جىلدار بويى قىزمەت اتقارعان دۇنيەجۇزى قازاقتارىنىڭ قاۋىمداستىعى اتىنان جازۋشى سۇلتانالى بالعابايەۆ اقىنعا تون كيگىزىپ، قۇتتىقتاۋ ءسوزىن سويلەدى.
«قازاق ادەبيەتىندە، پوەزياسىنا ءوز تاقىرىبىن الا كەلگەن قاسىم، مۇقاعالي سىندى اقىنداردىڭ قاتارىندا وسى جاركەن دە تۇرادى»، - دەپ ءسوز كەزەگىن العان مەملەكەتتىك سىيلىقتىڭ لاۋرەاتى، حالىق جازۋشىسى قابدەش جۇمادىلوۆ اقىندى مەرەيتويىمەن قۇتتىقتاي كەلە ونىڭ ناعىز قازاقى، بولمىسى تازا اقىن ەكەنىن ايتتى.
كەش بارىسىندا اقىننىڭ پوەزياسى جايلى مەملەكەتتىك سىيلىقتىڭ لاۋرەاتى، اقىن تەمىرحان مەدەتبەك ءسوز سويلەپ جاركەن ولەڭى جايلى سىر شەرتسە، اقىن ۇلىقبەك ەسداۋلەت اعاسىنا جىر ارنادى.
اقىنعا «جاس- اي» مەديتسينالىق ورتالىعىنىڭ ديرەكتورى جاساي زەكەي ۇلى تەمىر تۇلپاردىڭ كىلتىن تابىستادى.
اقىننىڭ سوڭىنان ەرگەن جاس بۋىن بودەش ۇلىنىڭ پوەزياسىن وقىپ، وتىرعان جۇرتتىڭ ىقىلاسىنا بولەندى. اۋەلەتىپ ءان سالىندى، كۇمبىرلەتىپ كۇي شەرتىلدى، وسىلايشا الماتى اسپانى مامىردىڭ مامىراجاي كۇنىندە كوركەم ولەڭنىڭ ھاس شەبەرى - جاركەن جىراۋدى جەتپىستىڭ بەلەسىنە شىعاردى.
اۆتور: مەيىرجان اۋەلحان ۇلى
سۋرەتتەردى تۇسىرگەن اۆتور
ماسساگەت
