13:08, 04 - قاراشا 2018 | GMT +5
زەرىككەن زەينەتكەر دۇكەنىنەن 700 رەت ويىنشىق ۇرلاعان
استانا. قازاقپارات - پاريجدە پوليتسيا ويىنشىق ساتاتىن دۇكەندەردەن 700 رەت ۇرلىق جاساعان 72 جاستاعى زەينەتكەردى ۇستادى. بۇل تۋرالى LCI باسىلىمى جازدى.
باسىلىمنىڭ حابارلاۋىنشا، زەينەتكەر ءوزى ۇرلاعان زاتتارىن ينتەرنەت ارقىلى ساتاتىن بولعان. پوليتسيانىڭ مالىمەتتەرىنشە، زەينەتكەر 2018 -جىلدىڭ ماۋسىم ايىنان بەرى جاڭا ويىنشىق ساتىلاتىنى تۋرالى 957 جارناما جاريالاعان.
جارناما ماتىنىندە ول ويىنشىقتاردىڭ جاڭا جانە ارنايى قوراپتا ساتىلاتىنىن دا قوسىپ قويعان. زەينەتكەردىڭ ءۇيىن تىنتكەن پوليتسيا قىزمەتكەرلەرى ول جەردەن 1 مىڭ ءتۇرلى زاتتار مەن 40 مىڭ ەۋرو قولما- قول اقشا تاپقان. ءوز كەزەگىندە زەينەتكەر ىستەيتىن ءىس بولماي ابدەن زەرىككەن سوڭ وسىنداي ارەكەتكە بارعانىن ايتقان.