استانا كۇنى تايقازانعا 700 كەلىدەن استام ەت اسىلىپ، رەكوردتىق كورسەتكىشكە قول جەتكىزىلمەك

استانا. قازاقپارات - 6 -شىلدە كۇنى ساعات 12.00 «حان شاتىر» ساۋدا، ويىن- ساۋىق ورتالىعىنىڭ الدىنداعى عاشىقتار ساياباعىندا 3 جىلقىنىڭ ەتى اسىلادى.

بۇل تارتۋدى استانا كۇنىنە وراي قازاقستان حالقى اسسامبلەياسى مەن قازاقستان گەوگرافيالىق قوعامى بىرلەسىپ جاساماق، دەپ حابارلانعان استاناداعى مەرەكەلىك ءىس- شارالاردىڭ رەسمي سايتىندا.

 ول ءۇشىن ساياباققا ارنايى تايقازان ورناتىلادى. ەرەكشە اتاۋ بەرىلگەن «تايقازان» اكتسياسىن ۇيىمداستىرۋشىلاردىڭ ماقساتى - قازاقتىڭ مەيىرباندىعى مەن قوناقجايلىلىعىن تاعى دا ءبىر مارتە تانىتۋ، بەرەكە مەن تاتۋلىق - ەلدىكتىڭ تۇعىرى ەكەنىن پاش ەتۋ.

شارانى ۇيىمداستىرۋشىلار 700 كەلىدەن استام جىلقى ەتىن اسۋ ارقىلى گيننەسستىڭ رەكوردتار كىتابىنا ەنۋدى ماقسات ەتىپ وتىر. ول ءۇشىن لوندوننان گيننەسستىڭ رەكوردتار كىتابى ۇيىمىنىڭ باس كەڭسەسىنەن ارنايى ماماندار كەلەدى. ازىرلەنگەن ەتتەن 3,5 مىڭنان استام ادام ءدام تاتىپ، تاباقتاس بولا الادى.