سالماعى - 700 كەلى، بويى - 2 مەتر. اباي وبلىسىندا جىلقىنىڭ جاڭا ءتۇرى پايدا بولدى
شويىنقارا جانە بايتورى دەگەن اتاۋ بەرىلگەن قىلقۇيرىقتىلاردىڭ ەرەكشەلىگى، بويى بيىك، ەتتى ءارى ءسۇتتى، كەز كەلگەن اۋا رايىنا ءتوزىمدى. مىنىسكە دە، جەگىسكە دە شىدامدى. كوكپارعا دا سالۋعا بولادى ەكەن.
«ەڭ العاش جىلقى قازاق جەرىندە ۇيرەتىلگەن دەپ ماقتانامىز. تۇرىكمەندەردە اقالتەكە بار، ارابتاردىڭ تازا قاندى تۇلپارى بار. «ءبىز كىمنەن كەمبىز؟ بىزدە نەگە وسىنداي اسىلتۇقىمدى جىلقى بولماسقا؟» دەگەن وي مەنى كوپتەن بەرى مازالاپ جۇرەتىن. سول ارمانعا 40 جىلدان كەيىن قول جەتتى. بىلتىر اۋىل شارۋاشىلىعى مينيسترلىگىنەن مەملەكەتتىك كوميسسيا كەلىپ، قازاقى جىلقىنىڭ جاڭا ءتيپىن اپروباتسيادان وتكىزدى. «ەلىمىزدەگى وزگە جىلقى تۇقىمدارىنان ونىمدىلىگى 25 پروتسەنتكە جوعارى» دەپ جاقسى باعا بەردى» دەيدى بەسقاراعايداعى اسىلتۇقىمدى جىلقى زاۋىتىنىڭ جەتەكشىسى حابيدۋللا مۋكينوۆ.
مۇعالجار مەن قابا جىلقىلارىن بۋدانداستىرۋ نەگىزىندە دۇنيەگە كەلگەن بەسقاراعاي جىلقىسىنىڭ باستى وزگەشەلىگى، ىرىلىگىندە. تەبىندەگى ايعىرلارى 700، بيەلەرى 600 كەلىگە دەيىن تارتادى.
«بۇل - ەلىمىزدىڭ جىلقى شارۋاشىلىعى سالاسىنداعى زور جەتىستىك. سەنساتسيا دەۋگە بولادى. تاۋەلسىزدىكتىڭ 30 جىلىندا قازاقى جىلقى ءتيپى العاش رەت شىعارىلىپ وتىر. جىلقى بولعاندا قانداي؟ ناعىز ۇيالماي كورسەتۋگە بولادى. بويىنىڭ بيىكتىگى 150 سانتيمەتر، كەۋدە ورامى 185 سانتيمەتر. بۇل - جايىلىمدا جۇرگەندەرى. بورداقىعا قويسا سالماعى ءبىر تونناعا دەيىن جەتۋى ابدەن مۇمكىن» دەيدى جىلقىتانۋشى، قازاق ۇلتتىق اگرارلىق زەرتتەۋ ۋنيۆەرسيتەتىنىڭ ن. بازانوۆا اتىنداعى فيزيولوگيا، مورفولوگيا جانە بيوحيميا كافەدراسىنىڭ مەڭگەرۋشىسى قايرات يسحان.
بۇعان دەيىن ەلىمىزدە قازاق جىلقىسىنىڭ جابى، كوشىم، مۇعالجار جانە قوستاناي سەكىلدى ءتورت تۇقىمى بار بولاتىن. ەندى مىنە، سولاردىڭ قاتارىنا بەسقاراعاي جىلقى ءتيپى قوسىلدى.
Massaget.kz
