كوكشەتاۋلىق 70 جاستاعى ارداگەر سپورتشى ەۋروپا چەمپيوناتىنان 2 «التىن» جۇلدەمەن ورالدى
پورتۋگاليانىڭ پورتو قالاسىندا كىر تاسىن كوتەرۋدەن قوس سايىس بويىنشا جاسوسپىرىمدەر، ەرلەر مەن ايەلدەر جانە ارداگەرلەر اراسىندا ەۋروپا چەمپيوناتى مەن ستۋدەنتتەر اراسىندا 6-الەم چەمپيوناتى ءوتتى. بايراقتى جارىسقا الەمنىڭ 14 ەلىنەن بارعان ءار جاستاعى 140 سپورتشى قاتىستى.
ونىڭ ىشىندە كوكشەتاۋ قالاسىنان بارعان 70 جاستاعى ارداگەر سپورتشى بوريس نۇعىمانوۆ ءساتتى ونەر كورسەتىپ، تىك جانە جۇلقا كوتەرۋ ءادىسى بويىنشا ءبىرىنشى بولىپ، ەكى «التىن» مەدالعا قول جەتكىزدى.
وبلىستىق دەنەشىنىقتىرۋ جانە سپورت باسقارماسىنىڭ مالىمەتى بويىنشا ءبوريستىڭ بۇل العاشقى جەڭىسى ەمەس، ول وسىعان دەيىن ارداگەرلەر اراسىندا وتكەن تالاي حالىقارالىق جارىستارعا قاتىسىپ، جۇلدەلى ورىنداردان كورىنىپ كەلەدى. بۇل جولى دا ول ءوزىنىڭ مىقتى ەكەنىن تاعى ءبىر مارتە دالەلدەپ وتىر.
اۆتور: اسلان وسپانوۆ
