جىل باسىنان بەرى ەلوردا حالقىنىڭ سانى 7,5 مىڭعا جۋىق ادامعا كوبەيدى

استانا. قازاقپارات - استانا قالاسى حالقىنىڭ سانى اعىمداعى ەسەپ بويىنشا 2015 - جىلعى 1 - مامىرعا  860368 ادامدى، سونىڭ ىشىندە «الماتى» اۋدانى بويىنشا -  380449 (%44,2)، «ەسىل» اۋدانى بويىنشا -  130669 (%15,2) ، «سارى ارقا» اۋدانى بويىنشا -  349250 (%40,6) ادامدى قۇرادى.

استانا قالالىق ستاتيستيكا دەپارتامەنتىنىڭ حابارلاۋىنشا، 2015 -جىلدىڭ باسىمەن سالىستىرعاندا استانا قالاسى حالقىنىڭ جالپى سانى 7486 ادامعا، سونىڭ ىشىندە «الماتى» اۋدانى بويىنشا - 595 ادامعا، «ەسىل» اۋدانى بويىنشا - 3841 ادامعا، «سارى ارقا» اۋدانى بويىنشا - 3050 ادامعا كوبەيدى، دەپ حابارلايدى  astana.kz.
 
 2015 - جىلعى قاڭتار- ساۋىردە حالىقتىڭ تابيعي ءوسىمى 6803 ادامدى، كوشى- قون ءوسىمى 683 ادامدى قۇرادى. 

 2015 -جىلعى قاڭتار- ساۋىردە استانا قالاسى بويىنشا تۇتاستاي العاندا، 8089 جاڭا تۋىلعان ءسابي تىركەلدى، بۇل وتكەن جىلعى سايكەس كەزەڭمەن سالىستىرعاندا %5,4- عا كوپ. سونىمەن قاتار، حالىقتىڭ تابيعي ءوسىمى وتكەن جىلعى قاڭتار- ساۋىرمەن سالىستىرعاندا %4,7- عا ارتىپ، 6803 ادامدى قۇرادى. 

 2015 - جىلعى قاڭتار- ساۋىردە ا ح ا ت ورگاندارىندا تىركەلگەن نەكەلەسۋلەر سانى وتكەن جىلعى سايكەس كەزەڭمەن سالىستىرعاندا %1,4- عا، اجىراسۋلار سانى %9,8- عا ءوستى.