قۇرىلىسشىلار قاۋىمداستىعىنىڭ باسشىسى 7-20-25 باعدارلاماسىن سىنادى

نۇر-سۇلتان. قازاقپارات - قازاقستان قۇرىلىسشىلار قاۋىمداستىعىنىڭ باسشىسى ۆيكتور ميكريۋكوۆ «7-20-25» باعدارلاماسىنىڭ تالاپتارى تۇرعىنداردىڭ تولەم قابىلەتىمەن سايكەسپەيتىنىن ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، اتالعان باعدارلاما جۇزەگە اسىرىلا باستاعان العاشقى جىلى 100 ميلليارد تەڭگە يگەرىلۋى كەرەك بولعان. ءبىراق ءىس جۇزىندە تەك 40 ميلليارد تەڭگە يگەرىلگەن.

«تولەم قابىلەتى بار سۇرانىستىڭ كولەمى ۋاقىت وتكەن سايىن ءتۇسىپ كەلەدى. يپوتەكالىق باعدارلامالاردىڭ كوبى مەرزىمى ءبىتىپ، جابىلىپ جاتىر. ال حالىققا مەملەكەت تاراپىنان قولداۋ كەرەك. سوندا عانا باسپاناعا الەۋەتتى سۇرانىس پايدا بولادى»، - دەدى ول قازاقپارات تىلشىسىنە تەلەفون ارقىلى بەرگەن شاعىن سۇحباتىندا.

بۇل ۋاجىنە ول «7-20-25» باعدارلاماسىن مىسال ەتىپ كەلتىردى.

«7-20-25» باعدارلاماسى قازىر جۇمىس ىستەپ تۇر. ونى ەشكىم توقتاتقالى جاتقان جوق. تالايدان بەرى بار. ءبىراق قالاي جۇمىس ىستەپ تۇر - بۇل باسقا ماسەلە. ونىڭ جۇمىس باعىتى دۇرىس ەمەس جانە ءاۋ باستا وزىنە ارتىلعان ءۇمىتتى اقتاپ جاتىر دەۋگە كەلمەيدى»، - دەدى ساراپشى.

قاۋىمداستىق باسشىسىنىڭ پايىمىنشا، باعدارلاماعا ۇلەسكەرلىك قۇرىلىس نىساندارى دا قاتىسا الۋى كەرەك بولعان.

«سونىڭ كەسىرىنەن تۇرعىن ءۇي سالۋشىلار پاتەرلەردى تەزىرەك ساتۋ ءۇشىن زاڭعا قايشى ارەكەتتەرگە بارىپ جاتىر. ياعني، برونداۋ تاسىلدەرىن ويلاپ تاۋىپ، الدىن الا كەلىسىمشارت دەگەن دۇنيەلەردى ىسكە قوستى. ويتكەنى بۇل باعدارلامانىڭ شارتى بويىنشا تەك قولدانىسقا بەرىلگەن ءۇيدى عانا ساتىپ الۋعا بولادى»، - دەدى ۆيكتور ميكريۋكوۆ.

ماماننىڭ ايتۋىنشا، الداعى 2 ايدا باسپانا باعاسى قىمباتتاماۋى كەرەك.