ەلباسى «7-20-25» تۋرالى: مەملەكەت مۇنان ارتىق جەڭىلدىك جاساي المايدى
بۇل تۋرالى بۇگىن ەلورداداعى تاۋەلسىزدىك سارايىندا ءوتىپ جاتقان VIII ازاماتتىق فورۋمدا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«تۇرعىن ءۇي قۇرىلىسى بويىنشا باعدارلاما بار. نە ىستەۋ كەرەك؟ 50، 70 ەمەس الاتىن پاتەرىڭنىڭ نە ءبارى 20 پايىز قۇنىن جيناۋىڭىز قاجەت. 25 جىلعا 7 پايىزبەن نەسيە الاسىز. مەن ەسەپتەپ شىقتىم. ەگەر وتباسىدا 2 ادام جۇمىس ىستەيتىن بولسا، تابىستارىنىڭ 20-30 پايىزىن تولەپ تۇرا الادى. تولەپ بىتكەننەن كەيىن پاتەر سەنىكى بولادى»، - دەدى ەلباسى.
ق ر پرەزيدەنتىنىڭ پايىمىنشا، الەمنىڭ ەش جەرىندە مۇنداي باعدارلاما جوق.
«ءبىز مۇنى جاسادىق، ونى جۇمىس ىستەپ، پايدالانۋ قاجەت. نيەت تانىتۋشىلار از دەيدى. ءبىز بارلىعىن يتەرمەلەيمىز. قالاعاندارى السىن. مەملەكەت مۇنان ارتىق جەڭىلدىك بەرە المايدى»، - دەدى نۇرسۇلتان نازاربايەۆ.
وسى رەتتە مەملەكەت باسشىسى «7-20-25» باعدارلاماسىنىڭ جۇزەگە اسىرىلۋىن ۇكىمەتتىك ەمەس ۇيىمدار باقىلاۋعا الۋى تيىستىگىن اتاپ ءوتتى.