ءزىلزالادا 6 كۇن توپىراق استىندا ءولى ءسابيىن قۇشاقتاپ جاتقان كەلىنشەك: كۇيەۋىم مەن ۇلىم ءۇشىن دە ءومىر سۇرەمىن
ال ءوزى ارادا التى كۇن وتكەندە ءۇيىندى استىنان تابىلدى، دەپ حابارلايدى قازاقپارات TRT Haber اگەنتتىگىنە سىلتەمە جاساپ.
قۇتقارۋشىلار ماكبۋلەنى 6 كۇننەن كەيىن ءۇيىندى استىنان الىپ شىقتى.
قۇشاعىندا 4,5 ايلىق ءسابيىنىڭ جانسىز دەنەسى بار ەدى. قاسىندا جاتقان كۇيەۋى جان ءتاسىلىم ەتكەن.
سول اياعى كەسىلىپ، 17 وپەراتسيانى باستان وتكەرگەن ادەبيەت ءپانىنىڭ مۇعالىمى ماكبۋلە پروتەز اياعىمەن ءجۇرۋدى ۇيرەنىپ ءجۇر.
ەندى ەندى ءوز بەتىنشە قادام باسا باستادى.
«147 ساعات توپىراق استىندا جاتتىم. العاشقى ءۇش تاۋلىكتىڭ الماسقانىن تەلەفونداعى وياتقىشتىڭ شىرىلداعانىنان ءبىلدىم. كۇيەۋىم سول كۇندەرى تاڭەرتەڭ ەرتە تۇرۋىم كەرەك دەپ وياتقىشتى ءبىر ۋاقىتقا قويعان ەدى. ودان كەيىنگى كۇندەردە تەلەفون شىرىلدامادى، كۇن مەن ءتۇندى اجىراتا المادىم. ايتەۋىر قوزعالماستان جاتتىم. التى كۇن بويى 4,5 ايلىق ءسابيىم قۇشاعىمدا بولدى. ءبارى- ءبارى ەسىمدە. شىركىن، ەشتەڭە ەسىمدە قالماعاندا عوي دەپ كۇرسىنەم كەيدە. وكىنىشكە قاراي، بولعان وقيعانىڭ ءبارى سانامدا سايراپ تۇر»، - دەيدى ماكبۋلە.
ول قۇدايدىڭ امان الىپ قالعانى بەكەر ەمەس، وعان ءبىر سەبەبى بار دەيدى.
«اۋرۋحانادان شىققان سوڭ ءومىرىمدى ءارى قاراي جالعايمىن، جولداسىم مەن ۇلىم ءۇشىن دە ءومىر سۇرەمىن. ولار ءارقاشان مەنىمەن بىرگە، جۇرەگىمدە بولادى. قاتتى ساعىنىپ ءجۇرمىن وتباسىمدى»، دەيدى كەلىنشەك.
