قاراعاندى وبلىسىنىڭ كەيبىر مەكتەپتەرىندە 6 كۇندىك وقۋ كەستەسى ەنگىزىلدى
1-قىركۇيەكتە اتا-انالار مەن 7-11-سىنىپ وقۋشىلارى 6 كۇندىك وقۋ كەستەسى ەنگىزىلگەنى تۋرالى جاڭالىقتان حاباردار ەتىلدى. مۇنداي شەشىمدى ءبىلىم سالاسىنىڭ وكىلدەرى جوعارى سىنىپ وقۋشىلارىنىڭ ساباقتارىنىڭ كوپتىگىمەن ءتۇسىندىردى. وتكەن جىلى، ەكىنشى اۋىسىمداعى وقۋشىلاردىڭ مەكتەپتەن كەشكى ساعات 21:00 كەزىندە قايتقان كەزدەرى بولعان.
وسىعان بايلانىستى اتا-انالار تاراپىنان كوپ شاعىم تۇسكەن. بيىل 5 كۇندىك وقۋ كەستەسىن 6 كۇنگە بولۋگە رۇقسات بەرىلدى.
«قولدانىستاعى سانيتارلىق-ەپيدەميولوگيالىق تالاپتارعا سايكەس، ءبىرىنشى جانە ەكىنشى اۋىسىمداعى ساباقتار اراسىنداعى ۇزىلىستەردىڭ ەڭ از ۋاقىت ليميتى بەكىتىلدى. كەستەگە بايلانىستى ساباقتى 08:00 دە باستايتىن مەكتەپتەردە ءبىرىنشى اۋىسىمداعى ساباقتار ساعات 14.05 تە (7 ساباق) اياقتالاتىن. ەكىنشى اۋىسىم ساعات 14:45 تە باستالاتىن ساباقتار كەشكى ساعات 20:50 دە (7 ساباق) اياقتالاتىن. وتكەن جىلى ەكىنشى اۋىسىمدا ءبىلىم الاتىن وقۋشىلاردىڭ اتا-انالار قاۋىمى ساباقتاردىڭ تىم كەش اياقتالاتىنىنا، قىس كەزىندە ءتىپتى قاراڭعىدا بىتەتىنىنە نارازىلىق ءبىلدىردى. وسى سەبەپتى 7، 8، 9، 10 جانە 11-سىنىپ وقۋشىلارىنىڭ ساباقتارىن 6 كۇنگە ءبولۋ تۋرالى شەشىم قابىلداندى. سوندا كۇن سايىن وتەتىن ساباقتار سانى 6 عا دەيىن قىسقارادى، ال سەنبى كۇندەرى تەك 4 ساباق بولادى»، - دەلىنگەن حابارلامادا.
6 كۇندىك وقۋدىڭ تومەنگى سىنىپ وقۋشىلارىنا قاتىسى جوق. ويتكەنى ولاردىڭ ساعاتى اپتاسىنا 30 دان اسپايدى. سونداي-اق 5 كۇندىك وقۋ ەرەجەسى ءبىر اۋىسىمدا ءبىلىم الاتىن مەكتەپتەردە دە قالدىرىلدى.
