بيزنەسكە زاڭسىز ارالاسقان سۋديادار ەندى 6 جىلعا سوتتالۋى مۇمكىن

استانا. قازاقپارات – ق ر قىلمىستىق كودەكسىنىڭ 364-بابىنا وزگەرىس ەنگىزىلمەك. ياعني، كاسىپكەرلىك قىزمەتكە زاڭسىز ارالاسقاندارعا قاتىستى جازا كۇشەيەدى.

مۇنداي باستامانى سىبايلاس جەمقورلىققا قارسى ءىس-قيمىل اگەنتتىگى ۇسىنىپ وتىر، دەپ حابارلايدى قازاقپارات ءتىلشىسى.

«مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن نە وعان تەڭەستىرىلگەن ادامنىڭ نە لاۋازىمدى ادامنىڭ كاسىپكەرلىك قىزمەتتى جۇزەگە اسىراتىن ۇيىم قۇرۋى نە مۇنداي ۇيىمدى باسقارۋعا زاڭدا بەلگىلەنگەن تىيىم سالۋعا قاراماستان، جەكە ءوزى نەمەسە سەنىم بىلدىرگەن ادام ارقىلى قاتىسۋى، ەگەر بۇل ءىس- ارەكەتتەر مۇنداي ۇيىمعا جەڭىلدىكتەر مەن ارتىقشىلىقتار بەرۋگە نەمەسە وزگە دە نىسانداعى جاقتاۋشىلىققا بايلانىستى بولسا - مۇلكى تاركىلەنىپ، بەلگىلى ءبىر لاۋازىمداردى اتقارۋ قۇقىعىنان ءومىر بويىنا ايىرا وتىرىپ، 3000 ا ە ك-كە (10350000 تەڭگەگە) دەيىن ايىپپۇل سالۋعا نە سول مولشەردە تۇزەۋ جۇمىستارىنا نە 800 ساعاتقا دەيىنگى مەرزىمگە قوعامدىق جۇمىستارعا تارتۋعا نە 3 جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى»، - دەلىنگەن اشىق نقا پورتالىندا جاريالانعان كودەكستىڭ جاڭا رەداكتسياسىندا.

ايتا كەتەيىك، قولدانىستاعى زاڭ تالابىنا ساي، مۇنداي قىلمىس جاساعاندارعا 1000 ا ە ك كولەمىندە ايىپپۇل سالۋ، 400 ساعاتقا قوعامدىق جۇمىستارعا تارتۋ نەمەسە 1 جىلعا سوتتاۋ بولماسا وسى مەرزىمگە باس بوستاندىعىن شەكتەۋ جازاسى قولدانىلادى.

سونداي- اق كاسىپكەرلىك قىزمەتكە زاڭسىز قاتىسقان قۇقىق قورعاۋ جانە ارنايى مەملەكەتتىك ورگانداردىڭ قىزمەتكەرلەرىنە قاتىستى جازا دا قاتاڭداتىلادى. اتاپ ايتقاندا، ولاردىڭ مۇلكى تاركىلەنىپ، ءومىر بويىنا بەلگىلى ءبىر لاۋازىمداردى اتقارۋ قۇقىعىنان ايرىلادى.

بۇعان قوسا، 4000 ا ە ك-كە (13800000 تەڭگەگە) دەيىن ايىپپۇل سالىنادى نە سول مولشەردە تۇزەۋ جۇمىستارىنا، 1000 ساعات قوعامدىق جۇمىستارعا تارتىلادى. اۋىر جازا رەتىندە 4 جىلعا دەيىن باس بوستاندىعىن شەكتەۋ جانە وسى سول مەرزىمگە سوتتاۋ شارالارى قولدانىلۋى مۇمكىن.

سونىمەن قاتار مۇنداي قىلمىس جاساعان مەملەكەتتىك لاۋازىمدى تۇلعالار دا جاۋاپكەرشىلىكتەن قۇتىلمايدى. كىنالى دەپ تانىلعاندارعا 5000 ا ە ك- كە (17250000 تەڭگەگە) دەيىن ايىپپۇل سالىنادى، 5 جىلعا سوتتالادى نەمەسە وسى مەرزىمگە باس بوستاندىعى شەكتەلەدى.

ال كاسىپكەرلىك قىزمەتكە زاڭسىز ارالاسقان سۋديالارعا مۇلكىن تاركىلەۋ، 6000 ا ە ك-كە (20700000 تەڭگەگە) دەيىن ايىپپۇل سالۋ، 6 جىلعا سوتتاۋ نە بولماسا وسىنداي مەرزىمگە باس بوستاندىعىن شەكتەۋ جازاسى تاعايىندالادى.

«كوبىنەسە لاۋازىمدى تۇلعالاردىڭ كوممەرتسيالىق كومپانيالاردى قۇرۋى جانە ولاردىڭ قىزمەتىنە قاتىسۋى وسى ۇيىمداردىڭ بيۋدجەت قاراجاتىن جىمقىرۋ ءۇشىن پايدالانۋىنا بايلانىستى. لاۋازىمدى تۇلعالاردىڭ كاسىپكەرلىك قىزمەتكە زاڭسىز قاتىسۋى تەك مەملەكەتتىك باسقارۋ تارتىبىنە عانا ەمەس، سونىمەن قاتار ادال كاسىپكەرلەردىڭ قۇقىقتارىنا، ونىڭ ىشىندە ەركىن باسەكەلەستىك قۇقىعىنا دا قارسى باعىتتالعانىن اتاپ وتكەن ءجون. وسىلايشا، ادال كاسىپكەرلەر مەملەكەتتىك كەلىسىمشارتتى الۋ ءۇشىن باسەكەلەستىك كۇرەسكە قاتىسۋ مۇمكىندىگىنەن ايىرىلادى. كورسەتىلگەن ءمان-جايلار قىلمىستىق قىزمەتتىڭ وسى تۇرىنە قارسى ءىس-قيمىل جاساۋعا باعىتتالعان باتىل شارالاردى، ونىڭ ىشىندە زاڭنامالىق سيپاتتاعى شارالاردى قابىلداۋدى تالاپ ەتەدى»، - دەپ تۇسىندىرمە بەرىلگەن وزگەرىسكە.

قۇجات 17-شىلدەگە دەيىن كوپشىلىك تالقىلاۋدا بولادى.