اعاسىمەن توبەلەسكەن جىگىتكە وق اتقان اتىراۋلىق 6 جىلعا سوتتالدى
جىلىوي اۋداندىق سوتىندا بۇزاقىلىق نيەتپەن دەنساۋلىققا قاساقانا اۋىر زيان كەلتىرگەنى ءۇشىن ايىپتالعان ب. -عا قاتىستى قىلمىستىق ءىس قارالدى. كۇدىكتىگە ق ر قىلمىستىق كودەكسىنىڭ 106-بابىنىڭ 2-بولىگىندەگى 7-تارماقپەن ايىپ تاعىلعان.
وقيعا بىلتىرعى 25-قىركۇيەكتە تۇنگى ساعات 02:00 شاماسىندا جىلىوي اۋدانىندا بولعان.
«ءوزارا ىشىمدىك ىشكەن ە. مەن جابىرلەنۋشىنىڭ اراسىندا كەلىسپەۋشىلىك تۋىنداپ، سوڭى توبەلەسكە ۇلاسقان. جانجالعا سەبەپكەر بولعان ە. وقيعا ورنىنان كەتىپ قالعان. ال، ونىڭ ءىنىسى ب. تۇنگى ساعات 02:45 تە جابىرلەنۋشىگە تەلەفون شالىپ، كەزدەسۋگە شاقىرعان. سوتتالۋشى ب. وزىمەن بىرگە اڭشىلىق قارۋىن الا شىققان. ساعات 03:15 تە قوعامدىق ورىنعا كەلىپ، وزگە ادامداردىڭ كوزىنشە جابىرلەنۋشىگە وق اتقان. جابىرلەنۋشى سول جاق سانىنان اۋىر دەنە جاراقاتىن الىپ، اۋرۋحاناعا جەتكىزىلگەن»، - دەپ حابارلادى اۋداندىق سوتتىڭ باسپا ءسوز قىزمەتى.
سوتتالۋشىنىڭ كىناسى جابىرلەنۋشىنىڭ ايعاقتارىمەن، ساراپتاما قورىتىندىلارىمەن جانە باسقا دا ءىس قۇجاتتارىمەن دالەلدەنگەن.
پروكۋرور سوتتالۋشىعا 6 جىل مەرزىمگە باس بوستاندىعىنان ايىرۋ جازاسىن تاعايىنداۋدى سۇراعان. ال، جابىرلەنۋشى تالابىن جوقتىعىن مالىمدەگەن. سوتتالۋشى ءوز كىناسىن ءىشىنارا مويىنداعان.
«سوت جازا تاعايىنداۋ بارىسىندا ب. -نىڭ قىلمىستىق جاۋاپتىلىعى مەن جازاسىن جەڭىلدەتەتىن ءمان-جايلار رەتىندە ونىڭ كىناسىن ءىشىنارا مويىنداۋىن، وتباسىلىق جاعدايىن، بۇرىن سوتتى بولماعانىن ەسكەردى. جازانى اۋىرلاتاتىن ءمان-جايلار انىقتالعان جوق. سوت ۇكىمىمەن ب. كىنالى دەپ تانىلىپ، وعان 6 جىل مەرزىمگە باس بوستاندىعىنان ايىرۋ جازاسى تاعايىندالدى»، - دەپ ءمالىم ەتتى اۋداندىق سوتتىڭ باسپا ءسوز قىزمەتىنەن.
سوت ۇكىمى زاڭدى كۇشىنە ەنگەن جوق.
ەسكە سالا كەتەلىك، بۇدان بۇرىن اتىراۋدا القابيلەر 21 ادامعا قاتىستى قىلمىستىق ىسكە شەشىم شىعارعانىن جازعان ەدىك.
