نازاربايەۆتىڭ نەمەرە ءىنىسى قايرات ساتىبالدىنى پروكۋرور 6 جىلعا باس بوستاندىعىنان ايىرۋدى سۇرادى

استانا. قازاقپارات - پروكۋرور بۇرىنعى پرەزيدەنت نۇرسۇلتان نازاربايەۆتىڭ نەمەرە ءىنىسى قايرات ساتىبالدىنى التى جىلعا باس بوستاندىعىنان ايىرۋدى سۇرادى.

بۇعان قوسا، مۇلىكتەرىن تاركىلەپ، بەلگىلى ءبىر قىزمەتتەر ىستەۋگە تىيىم سالۋدى ءوتىندى.

ۇ ق ك گەنەرال-مايورى، «قۇرمەت»، «پاراسات» اتاقتارىنان ايىرۋ قاجەتتىگىن ايتتى.

مەملەكەتتىك ايىپتاۋشى «ساتىبالدىنىڭ قاماۋدا بولعان ءار كۇنىن 1,5 كۇنگە ەسەپتەۋدى» دە سۇرادى.

سۋديا كەڭەسۋ بولمەسىنە كەتتى.

نۇرسۇلتان نازاربايەۆتىڭ نەمەرە ءىنىسى قايرات ساتىبالدى «قازاق تەلەكومنان» 12,7 ميلليارد تەڭگە، «قازاقستان تەمىرجولى» كومپانياسىنا تيەسىلى «كولىك سەرۆيسى ورتالىعىنان» 28,6 ميلليارد تەڭگە جىمقىرعان دەپ ايىپتالعان.

ەكس-پرەزيدەنت نۇرسۇلتان نازاربايەۆتىڭ نەمەرە ءىنىسى قايرات ساتىبالدى ناۋرىزدا قاماۋعا الىنعان ەدى. ونىڭ ۇستىنەن «الداۋ جولىمەن مۇلىكتىك زالال كەلتىردى»، «سەنىپ تاپسىرىلعان بوتەن مۇلىكتى يەمدەنىپ الۋ نەمەسە تالان-تاراجعا سالدى» دەگەن ايىپپەن قىلمىستىق ءىس قوزعالعان.

بۇدان بولەك ساتىبالدى «سالىقتان جانە كەدەن تولەمدەرىنەن جالتاردى»، «قىلمىستىق جولمەن تاپقان تابىسىن زاڭداستىردى» دەگەن كۇدىكپەن دە تەرگەلىپ جاتىر. ول Forbes Kazakhstan ەسەبى بويىنشا قازاقستانداعى ەڭ ىقپالدى بيزنەسمەندەردىڭ تىزىمىنە كىرگەن. ونىڭ ايەلى گۇلميرا ساتىبالدى دا «بيزنەستى رەيدەرلىك جولمەن تارتىپ الدى» دەگەن ايىپپەن قاماۋعا الىنعان.

ساراپشىلار قاڭتار وقيعاسىنان سوڭ ەكس-پرەزيدەنت تۋىستارىنىڭ قاماۋعا الىنىپ، وتباسى مۇشەلەرىنىڭ جوعارى لاۋازىمداردان شەتتەتىلگەنىن بۇرىنعى كلاننىڭ السىرەگەنى رەتىندە باعالايدى.